«Տեղի ունեցածը միջազգային քաղաքական-տնտեսական վերնախավերի մի մասի լայն կոնսենսուսի արդյունք է». Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը․ «Այն, ինչ վերջին տարիներին տեղի ունեցավ Հայաստանի հետ, ներառյալ Արցախի կորուստն ու հայաթափումը, հավանաբար, միջազգային քաղաքական-տնտեսական վերնախավերի մի մասի լայն կոնսենսուսի արդյունք է։ Հարավային Կովկասում առկա ստատուս քվոն խախտելու պայմանավորվածությունն ազդեցիկ միջազգային խաղացողների միջնաժամկետ շահերի փոխադարձ ապահովման համատեքստում է տեղի ունեցել։ Կարելի է միանգամայն հիմնավոր եզրակացության հանգել, որ Արցախի հանձնումն ու ՀՀ տարածքի մի մասի օկուպացիան տեղի է ունեցել Ուկրաինայում պատերազմ սկսելու իրավունքի և Մոսկվայի՝ Թուրքիայի շնորհիվ կատարյալ մեկուսացումից խուսափելու առարկայական երաշխիքների դիմաց։ Դրա հետ մեկտեղ, անհրաժեշտ է նաև նկատի ունենալ այն, որ Ռուսաստան, Թուրքիա, Ադրբեջան, Իսրայել շրջանակի տեղային շահերի առաջմղումը շատ ավելի ընդգրկուն վերպետական, աշխարհաքաղաքական գործընթացի ուղղորդումն ու կառավարումը ապահովող ծրագրի բաղադրատարր է և ունի կոնկրետ հովանավորներ ու շահառուներ՝ նշված շրջանակից դուրս»։