«Դպրոց չհաճախելու պատճառը կոշիկ կամ հագուստ չունենալը չէ, երեխաներին ուղղորդում են մուրացկանության». Լիլիթ Ստեփանյան

«Միջազգային փորձը ցույց է տալիս, որ աղքատությունը կարելի է կրճատել միայն և միայն կրթության միջոցով»,- այս մասին ԱԺ-ում Սոցիալական աջակցության մասին և կից ներկայացվող օրենքների նախագծերի փաթեթի քննարկման ժամանակ նշեց ԱԺ աշխատանքի և սոցիալական հարցերի հանձնաժողովի անդամ Լիլիթ Ստեփանյանը:

Նրա խոսքով՝ եթե սոցիալական խնդիրներ ունեցող ընտանիքի երեխան դուրս է մնում կրթությունից, ապա սա ապացույց է, որ այդ ընտանիքը շարունակելու է մնալ սոցիալական ծանր պայմաններում և աջակցություն ստանալ:

«Եթե սոցիալապես անապահով ընտանիքի կամ առհասարակ որևէ ընտանիքի երեխան դուրս է մնում կրթությունից, ամենևին չի նշանակում, որ դրա հիմնական պատճառը կոշիկի կամ հագուստի բացակայությունն է: Բազմաթիվ են դեպքերը, երբ ընտանիքի անդամները կամ ծնողները դպրոցում սովորելու կամ մանկապարտեզ հաճախելու ընթացքում այլ տեղեր են ուղարկում՝ մասնավորապես մամուլում հրապարակումներ կան, որ երեխան դպրոցում կամ մանկապարտեզում հայտնվելու փոխարեն զբաղվում է մուրացկանությամբ»,- նշեց Ստեփանյանը՝ հավելելով, որ քննարկվող նախագծով նախատեսվում է նաև կանխարգելել նման երևույթները: