«Պարզ է՝ sms եք ստացել». Արամ Օրբելյանը՝ դատավորին

«Մարտի 1-»-ի գործով վերաբացված դատական նիստի ժամանակ փաստաբան Արամ Օրբելյանը դիմելով դատավոր Սարգիս Պետրոսյանին, ով իր խոսքում նշել էր, որ անկողմնակալ դիտորդը արդեն հոգնել է այս գործի ձգձգվող գործընթացներից, ասաց. «Իրականում քիչ առաջ խիստ մտահոգող բան տեղի ունեցավ: Ցիտում եմ՝ հանրությունը հոգնել է ձգձգվող գործելակերպից: Պարզաբանեք՝ ի՞նչ նկատի ունեք, հանրության կարծիքը ո՞նց եք չափել, ո՞վ է չափել, ինչո՞վ եք չափել»: Դատավորը պատասխանեց, որ «իր գնահատմամբ», ինչին էլ Օրբելյանը հավելեց՝ «լավ, sms եք ստացել» և հիմնավորեց իր ասածը. «sms եք ստացել ձևակերպումը ունի շատ հստակ նշանակություն, որովհետև դատական համակարգի անկախությունը ապահովելու պարտավորություն ունեցող մի հոգի, ով պարտավոր էր անկախ լինել և ապահովել դատական անկախությունը գործադիրի գործունեությունից, ստացել էր sms և այդ sms-ի արդյունքում հրաժարական էր տվել: sms ստանալու պրոցեսը ունի շատ հստակ նշանակություն և կարա հանգիստ բացարկի հիմք հանդիսանա, որովհետև գործերի ձգձգման մտահոգությանը հաջորդել է համապատասխան գործընթաց, որի արդյունքում ՀՀ մի շարք պաշտոնատար անձինք, որոնք պետք է անկախ լինեին և էդ sms-ը ուղարկելու համար էդ մարդուն քրեական պատասխանատվության ենթարկեին, հրաժարական են տվել: Սրա մասին է խոսքը: Երբ որ ես ձեզ նման գնահատական եմ տալիս, իրավունք ունեմ նման կասկած ունենալու՝ ձեր ասած ձևակերպման հիմքով՝ հոգնել են ձգձգվող գործընթացներից»: