«Հունվարից սկսած հավելավճարները տրամադրվելու են ուսուցիչներին». Ժաննա Անդրեասյան

«Ուսուցիչների ատեստավորումը 2024-ին կազմակերպվեց ուշ՝ նոյեմբերի ընթացքում, կապված էլեկրոնային եղանակով նոր համակարգի հետ»,- այսօրվա ասուլիսի ժամանակ ասաց ԿԳՄՍ նախարար Ժաննա Անդրեասյանը՝ անդրադառնալով ուսուցիչների ատեստավորմանը և տրամադրվող հավելավճարներին: «Վերջին ատեստավորումները նոյեմբերի 22-ին և 24-ին են անցկացվել: Դրանից հետո ընթացել է բողոքարկման գործընթաց և եղել է հրաման, որով վերջնական ֆիքսվել են ուսուցիչների արդյունքները. դա եղել է դեկտեմբերի վերջին, հետևաբար հավելավճարը հաշվարկվում է որոշման օրվանից հետո»,- նշեց նախարարը և ընդգծեց, որ հունվարից սկսած հավելավճարները տրամադրվելու են ուսուցիչներին, իսկ ժամկետն էլ հաշվարկվելու է որոշումը կայացնելու օրվանից: Նախարարի խոսքով՝ ատեստավորման համար դիմած ուսուցիչների 80 տոկոսը մասնակցել է՝ շուրջ 5000 մասնակից. «Ավելի քան 70 տոկոսը հաջողությամբ է հաղթահարել ատեստտավորումը, որի արդյունքում ունենալու է կա՛մ դրույքաչափի փոփոխություն, կա՛մ փոփոխություն և հավելավճար»: