«Ալիևի հայտարարություններն ուղղված են ոչ այնքան Հայաստանին, որքան աշխարհաքաղաքական կենտրոններին»․ Վահե Դավթյան

Էներգետիկ անվտանգության փորձագետ Վահե Դավթյանի ֆեյսբուքյան գրառումը․ «Պետք չէ հասարակության հետ խոսել այնպես, կարծես խոսում եք երեխայի հետ։

Իսկ եթե հասարակությունը քաղաքականապես դեռ մանուկ է, ապա փորձեք արագացնել նրա հասունացումը։

Ինչպե՞ս։

Նախևառաջ՝ մի՛ վախեցրեք նրան տարբեր սարսափ պատմություններով, տվյալ դեպքում՝ Ալիևի հայտարարություններով։

Եթե իրական փորձագետ կամ հրապարակախոս եք, այլ ոչ թե խայծ բռնող, բացատրե՛ք հասարակությանը, որ նման հայտարարություններն ուղղված են ոչ այնքան Հայաստանին, որքան այն աշխարհաքաղաքական կենտրոններին, որոնց հաճախ անտեսանելի, բայց տիտանական ջանքերի շնորհիվ զսպվում է թուրք-ադրբեջանական էքսպանսիան տարածաշրջանում։

Կարծում եմ, դժվար չէ կռահել այդ կենտրոնների աշխարհագրությունը։ Իսկ եթե դժվար է, ապա ուշադրությո՛ւն դարձրեք թուրք-իրանական ու ադրբեջանա-ռուսական խմորումներին։ Թեև մեզ տեսանելի է միայն այսբերգի գագաթը»։