«Անընդունելի են Ռուսաստանից հնչող՝ Հայաստանի նկատմամբ ագրեսիայի հրավերները»․ Սոնա Ղազարյան

«Մենք վերարտադրում ենք գոյություն ունեցող պետական սահմանը, մենք նոր սահման չենք գծում, այլ վերականգնում ենք այն սահմանը, որը կար Ալմաթիի հռչակագրով․ Խորհրդային Հայաստանի և Խորհրդային Ադրբեջանի միջև գոյություն ունեցող ադմինիստրատիվ սահմանը վերածվում է պետական սահմանի։ Այսինքն՝ սահմանը գծվելու է այդ հիմքով՝ հաշվի առնելով նախկին սահմանը»,- այս մասին «Ֆակտոր»-ի եթերում նշել է ԱԺ «Քաղաքացիական պայմանագիր» խմբակցության պատգամավոր Սոնա Ղազարյանը։

Պատգամավորի դիտարկմամբ՝ ՀԱՊԿ-ում գերակշռում է ռուսական այն դիրքորոշումը, որ Հայաստանի և Ադրբեջանի միջև լողացող սահման է, սահմանի չգոյություն է։ «Սա շատ վտանգավոր թեզ է, և հենց սրա պատճառով է, որ մենք պատրաստվում ենք վերանայել առհասարակ մեր անդամակցությունը ՀԱՊԿ-ին, և պատեհ պահի որոշումներ կկայացնենք։ Շատ անընդունելի են Ռուսաստանից հնչող՝ Հայաստանի նկատմամբ ագրեսիայի հրավերները։ Հայ-ռուսական ռազմավարական համաձայնագրերը չաշխատեցին ՀՀ-ի նկատմամբ օկուպացիայի պարագայում, ինչը լուրջ վնաս է հասցրել հայ-ռուսական հարաբերություններին։ Ավելին՝ հայ-ռուսական հարաբերություններին երբևէ ավելի մեծ վնաս չի հասցրել որևէ այլ բան, քան ՌԴ-ի և ՀԱՊԿ-ի վերջին շրջանի հրապարակումները։ Սրանք են զայրացրել հայ ժողովրդին։ Եվ հարցումների արդյունքում պարզվել է, որ հայ ժողովուրդը ՌԴ-ին սկսել է դիտարկել որպես 3-րդ սպառնալիք՝ Ադրբեջանից և Թուրքիայից հետո»,- նշել է Ղազարյանը։

Իշխանական պատգամավորը ևս մեկ անգամ ընդգծել է, որ ՀՀ-ն իր և իր հարևանների տարածքային ամբողջականությունը ճանաչում է Ալմաթիի հռչակագրի հիմքով․ «Եվ եթե ՀԱՊԿ-ը չի ճանաչում, ուրեմն դադարել է սահման ունենալուց և ուրեմն դադարել է գոյություն ունենալ առհասարակ, որովհետև ռազմական միավորները, երբ որ սկսում են չճանաչել սեփական սահմանները, դադարում են գոյություն ունենալ»։ Նրա խոսքով՝ ՀՀ-ն մեկ տարվա կտրվածքով՝ թե՛ գործադիրի, թե՛ խորհրդարանի մակարդակով, քաղաքական որոշում է կայացրել չվճարել ՀԱՊԿ անդամավճարներ․ «Սա նշանակում է նաև, որ չենք ուղարկելու այնտեղ ներկայացուցիչ, մենք չենք օգտվելու մեր քվոտաներից, և ինչպես պարոն Պապիկյանն է հայտարարել՝ գեթ մեկ սպա չի ծառայելու ՀԱՊԿ տարածքում․ ՀԱՊԿ ԳՇ-ից հետ են կանչվել»,- հավելել է պատգամավորը։