«Արշակ Կարապետյանի անցյալը կարող է լինել սկանդալային՝ ինչպես Մարիամ Մագթաղենացունը, բայց ինձ նրա ծրագրերն են հետաքրքրում»․ Միքայել Աջապահյան

«Ես Արշակ Կարապետյանին ո՛չ ճանաչել եմ, ո՛չ էլ հիմա կարող եմ ասել, թե ճանաչում եմ․ մի անգամ տեսակապով եմ խոսել, մի քանի անգամ էլ հեռախոսազրույց ենք ունեցել։ Եթե մարդը ցանկություն ունի իր անցյալը վերանայելու, մենք՝ որպես հոգևորական, պետք է տա՞նք այդ հնարավորությունը, թե՞ ոչ»,- այս մասին «24Նյուզ»-ի հետ զրույցում նշեց Շիրակի թեմի առաջնորդ Միքայել արքեպիսկոպոս Աջապահյանը՝ անդրադառնալով ՀՀ ՊՆ նախկին նախարար Արշակ Կարապետյանի հետ «Համահայկական միասնական խորհուրդ» նոր ուժի ստեղծման վերաբերյալ հարցին։

Աջապահյանն ընդգծեց, որ Կարապետյանի անցյալն իրեն չի հետաքրքրում, այլ հետաքրքրում է նրա ներկան և ապագային միտված ծրագիրը։ «Իր անցյալը կարող է շատ սկանդալային լինել, ինչպես Մարիամ Մագթաղենացունը, ես նրա անցյալով չեմ հետաքրքրվում։ Ես նրա կողքին կարող եմ լինել ոչ թե օրհնելու համար, այլ ասելու համար՝ այստեղ ճիշտ ես, այստեղ սխալ։

Ես որևիցե մեկին չեմ միացել, բայց որևիցե մեկին չեմ արգելում մոտենալ ինձ և օգտվել իմ պոտենցիալից, այո, նաև շահարկել իմ անունը՝ հայրենիքի փրկության համար։ Իմ նպատակը սեփական վարկանիշը չէ։ Ես ասում եմ բաներ՝ հարվածներն ինձ վրա վերցնելով»,- նշեց Աջապահյանը։