«Ով պաշտպանում է ՔՊ-ին և նրա առաջնորդին, պաշտպանում է 2-րդ նախագահին և հակառակը». Տիգրան Պասկևիչյան

Գրող, հրապարակախոս, ռեժիսոր Տիգրան Պասկևիչյանը ֆեյսբուքյան իր էջում գրել է. «ԻՄ ՏՊԱՎՈՐՈՒԹՅԱՄԲ
ՔՊԿ-ն վաղաժամ սկսել է գալիք տարվա խորհրդարանական ընտրությունների քարոզարշավը։ Ամենացայտուն նշանը 2-րդ նախագահի ծավալուն ասուլիսն էր եւ դրա դեմ ՔՊ-ի ամենատարբեր ռանգի (եֆրեյտորից մինչեւ մարշալ) անդամների համակարգված հարձակումները։
Դիլեման, իհարկե, նույնն է՝ Արեւմո՞ւտք, թե՞ Ռուսաստան։
Այս ամենը տեսնելով՝ կարելի է տպավորվել, որ ՔՊ-ի առաջնորդն ունի երկու սցենար՝ վերարտադրել իր իշխանությունը, եթե դա հնարավոր լինի (Արեշի հայաթներից հատիկ առ հատիկ БУ քաշ տալով կառավարության штрафплощадка), կամ իշխանությունը սահուն կերպով հանձնել 2-րդ նախագահին։
Այս ամենն, իհարկե, կախված է աշխարհաքաղաքական մեծ վերադասավորումներից։ Ինչ կպայմանավորվեն Թրամփն ու Պուտինը Ուկրաինայի հարցում, ըստ դրա կգործի սցենարներից մեկը։
Սա քաղաքական կանխատեսում չէ։ Պարզապես գրում եմ, որ այստեղ մնա… ապագայի համար։
Մինչ այդ ուզում եմ ասել, որ երկու սցենարն էլ կխոտանի միայն միացյալ այն ուժը, որը կկարողանա վերացնել «Արեւմո՞ւտք, թե՞ Ռուսաստան» կեղծ երկմտանքը։
Աշխարհն այնպես է խառնվել, որ հիմա ոչ Արեւմուտքն է արեւմուտքում, ոչ Ռուսաստանն է հյուսիսում, մինչդեռ Հայաստանը շարունակում է մնալ իր տեղում, եւ հարկ է կենտրոնանալ սեփական խնդիրների վրա՝ ուշադրությունը չշեղելով աշխարհում կատարվողից։
Այսուհանդերձ, ով կամա թե ակամա, գիտակցված կամ անգիտակից, ի սրտե կամ շահադիտական նպատակներով պաշտպանում է ՔՊ-ին եւ նրա առաջնորդին, պետք է հասկանա, որ պաշտպանում է 2-րդ նախագահին։ Իսկ ով հույս է կապում 2-րդ նախագահի հետ, պետք է գիտակցի, որ հարթում է ՔՊ-ի առաջնորդի եւ նրա մերձավոր շրջապատի անխուսափելի պատասխանատվությունից խուսափելու ճանապարհը։
Նորից եմ կրկնում՝ ես կանխատեսող չեմ։ Կհանդիպենք 2026-ի ամռանը»։