«ՀՀ-ն պետք է դիմի Շվեյցարիային, վերջինս էլ՝ Ադրբեջանին». Արտակ Բեգլարյան

Շուրջ 4 տասնյակ ՀԿ-ներ այս պահին ԱԳՆ շենքի մոտ են՝ նամակ հանձնելու նախարար Արարատ Միրզոյանին, որով կոչ են անում Հյուպատոսական հարաբերությունների մասին Վիեննայի կոնվենցիայի համաձայն, Բաքվում պահվող հայ գերիների նկատմամբ կիրառել հյուպատոսական հասանելիության ապահովման մեխանիզմ երրորդ երկրների միջոցով: Ակցիայի մասնակիցները նամակ կհանձնեն նաև Շվեյցարիայի դեսպանությանը:

Ակցիայի մասնակից, Արցախի նախկին ՄԻՊ Արտակ Բեգլարյանը մանրամասնեց. «Այսօրվա նամակների գլխավոր կոչն այն է, որ ՀՀ-ն՝ որպես Ադրբեջանում պատանդառված անձանց քաղաքացիության երկիր, դիմի Շվեյցարիային՝ որպես չեզոք երկիր, Շվեյցարիան՝ Ադրբեջանին, որպեսզի հյուպատոսական ծառայությունից օգտվեն մեր պատանդառված անձինք: Ադրբեջանում Շվեյցարիայի հյուպատոսն այցելություն ունենա ՀՀ քաղաքացիներին: Մեր այս կոչը հիմնված է Վիեննային կոնվենցիայի վրա: Սա հրատապ միջոց է, որը պետք է ՀՀ-ն կիրառի»: