«Սխալ լրացրած թղթի պատճառով կալանավորին ստիպում են 2 տարի ավելի մնալ բանտում. նա ինքնասպանության շեմին է». Ռոզա Վարդանյան
173
Երեկ, 23:30
Լրագրող Ռոզա Վարդանյանը գրել է. «ՀԱՂՈՐԴՈւՄ Ինքնասպանության շեմին գտնվող կալանավորի աբսուրդի ժանրից պատմությունը «Արմավիր» ՔԿՀ-ի կալանավոր 36-ամյա Հարություն Մուրադյանի պատժի կրման ժամկետը դեռևս 2024 թվականի նոյեմբերին լրացել է, սակայն դատարանի/դատավորի/ քրեակատարողական հիմնարկի/ կամ դեռևս անհայտ պետական մարմնի պատճառով Մուրադյանն ավելի քան 4 ամիս է՝ ապօրինաբար շարունակում է մնալ բանտում։ Ի Ն Չ Ո՞Ւ Հարություն Մուրադյանը կալանքի տակ է 2019 թվականից, 2020 թվականի մայիսին նրա մասով դատավճիռ է կայացվել։ Օրեր անց դատարանը՝ դատավոր Վարդան Գրիգորյանի նախագահությամբ, Մուրադյանի մասով հաստատականն ուղարկել է ՔԿՀ։ 2 տարի անց՝ 2022 թվականի մայիսին, ՔԿՀ-ն հանկարծ պարզում է, որ հաստատականը բացակայում է կալանավորի գործից, ուստի նորից է դիմում դատավոր Գրիգորյանի գրասենյակ։ Կալանավորի խոսքով՝ դատավորը կրկին հաստատական է ուղարկում, սակայն, ՈՒՇԱԴՐՈՒԹՅՈՒՆ, ոչ թե 2020 թվականի մայիսի ամսաթվով, այլ 2022 թվականի մայիսով։ Ստացվում է, Հարություն Մուրադյանի 2 տարի բանտում պահվելը «փուչ է եղել»։ Այս սխալի պատճառով Մուրադյանը, որը հիշեցնում եմ, պետք է 2024 թվականի նոյեմբերին ազատության մեջ լիներ, բանտում պետք է մնա մինչև 2026 թվականի դեկտեմբեր։ Ի՞ՆՉ ԵՆ ԱՍՈՒՄ ՊԱՏԱՍԽԱՆԱՏՈՒՆԵՐԸ ԴԱՏԱՎՈՐԸ Դատավոր Վարդան Գրիգորյանը դեռևս 3 ամիս առաջ «Ֆակտոր»-ի հետ զրույցում ասում էր՝ թյուրիմացություն է եղել, փորձում են վրիպակը շտկել։ «Մեղադրանքը», սակայն դատավորը չի ընդունում, ասում է՝ 2022 թվականին ինքը ՔԿՀ-ին գրել և կրկին ուղարկել է կատարողականը։ Դատական դեպարտամենտն ասում է, որ դատավորը Մուրադյանի ամբողջ գործը փաթեթով կրկին ուղարկել է ՔԿՀ, ուստի հենց գործից պետք է հասկացվեր, որ 2020 թվականին է կայացվել դատավճիռը։ Կասկած են հայտնում, որ, հնարավոր է, 2020 թվականի մայիսին ոստիկանություն ուղարկված կատարողականի ամբողջ փաթեթը կորել է ոստիկանության ճանապարհին կամ ոստիկանության ձեռքով։ ԳԼԽԱՎՈՐ ԴԱՏԱԽԱԶՈՒԹՅՈՒՆ Գլխավոր դատախազությունից նշեցին, որ հարցն իրենց տիրույթում չէ։ ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆ Հարություն Մուրադյանը մի քանի անգամ դիմել է անձամբ պաշտպանին, զանգել Թեժ գիծ ու մեծամասամբ ստացել կարճ պատասխան՝ զբաղվում ենք։ 4 ամիս է որևէ հստակ գործնական քայլ չի կատարել քաղաքացու իրավունքներով զբաղվող կառույցի կողմից։ ՓԱՍՏԱԲԱՆ Կալանավորի ֆինանսական միջոցները բավարար չեն եղել, ուստի Մուրադյանի քրեական գործերով զբաղվում է հանրային պաշտպանը, որը, պարզվում է՝ այս գործով ոչինչ չի անում։ «Լիազորություն չունեմ, ես Մուրադյանի մյուս գործով եմ ներգրավված»,- ասել է պաշտպանը։ Իմ հարցին. «Իսկ ի՞նչ անի Մուրադյանը», պաշտպանը տվեց ինձ համար ամենաաբսուրդ պատասխանը. «Իրեն խորհուրդ եմ տվել դիմի պայմանական վաղաժամկետ ազատման համար»... Դեմքս չգիտեմ էդ պահին ինչ արտահայտեց, բայց էս մի քանի ամսվա վրդովմունքս իր վրա թափեցի. «Այսի՞նքն, ինչի՞ պայմանականի համար դիմի, եթե դատաիրավական համակարգի սխալի հետևանքով է մինչև օրս բանտում, ինչի՞ պետք է դիմի, որ մի հատ էլ դատարանը լավություն դիտարկի ու պայմանականով ազա՞տ արձակի, գոնե սխալը շտկի»։ Էլ չշարունակվեցի, անիմաստ էր... ՔՐԵԱԿԱՏԱՐՈՂԱԿԱՆ ԾԱՌԱՅՈՒԹՅՈՒՆԸ ՎԱՂԸ ԿՊԱՏԱՍԽԱՆԻ։ Ինչի՞ եմ էսքան երկար ու մանրամասն գրում, որովհետև Հարությունը կանգնած է ինքնասպանության շեմին։ Տարեսկզբին կալանավորը հուսահատության շեմին փորձել էր կախվել, լավ է՝ խցակիցը ժամանակին էր հասել։ Մուրադյանը 2 անգամ հացադուլ է հայտարարել՝ փորձելով այդ կերպ ուշադրություն հրավիրել իր գործին։ Հիմա 36-ամյա տղամարդը, որը խնամքին 2 փոքրիկ երեխա ունի, բավական ծանր հոգեբանական վիճակում է։ Եթե էս ապօրինության դեմը ժամանակին չառնեն, օրեր անց մահվան նոր դեպքի մասին կլսենք, ախուվախ կանենք, կփորձենք համակարգային հասկանալ խնդիրն ու կանցնենք առաջ, սակայն մահվան յուրաքանչյուր դեպքի հետևում մարդկային մի այսպիսի տխուր պատմություն է... Հիմա էս մարդն ի՞նչ անի Նիկոլ Փաշինյան, ՀՀ Մարդու իրավունքների պաշտպան, Անահիտ Մանասյան, Դատական իշխանություն, Սրբուհի Գալյան, Երանուհի Թումանյանց, Կարեն Թումանյան, ՀՀ ԱՆ քրեակատարողական ծառայություն, Ռուստամ Բաքոյան, ՀՀ արդարադատության նախարարություն, ՀՀ ներքին գործերի նախարարություն: Իսկ թե ինչո՞ւ է Մուրադյանը դեռևս կալանավորի կարգավիճակում, դա էլ առանձին աբսուրդ պատմություն է»։
