«Առողջություն և իրավունք» ՀԿ համահիմնադիր Ծաղիկ Վարդանյանի ֆեյսբուքյան գրառումը. «Նորից անհարգի վերաբերմունք բուժաշխատողի նկատմամբ Այսօր նորից արձանագրվել է շտապօգնության բրիգադի նկատմամաբ բռնության դրսևորում՝ քաղաքացին դանակով հարձակվել է բուժաշխատողի վրա: Վերջին տարիներին Հայաստանում հաճախացել են բժշկական ոլորտի աշխատակիցների նկատմամբ բռնության դեպքերը։ Ըստ Ներքին Գործերի նախարարության տրամադրած տվյալների՝ 2023-2025 թթ. ընթացքում արձանագրվել է 27 նմանատիպ դեպք: Այս տարվա առաջին երկու ամիսների ընթացքում արդեն գրանցվել էր 4 դեպք՝ Շիրակի մարզի Ազատան գյուղում, Վայոց ձորում և Երևանում։ Երեք դեպքում բռնության թիրախում եղել են շտապօգնության բուժաշխատողները, մեկում՝ հիվանդանոցի անձնակազմը։ Այժմ արձանագրվեց նաև այս տարվա բժշկական ոլորտի աշխատակիցների նկատմամբ բռնության 5-րդ դեպքը: Իրականում բռնության փորձերը բուժաշխատողների նկատմամաբ ավելի շատ են: Հիմնականում այն ոստիկանություն չի հասնում, տեղում «հաշտեցման» գործընթաց են նախաձեռնում: Ավելի խոցելի են շտապ օգնության, վերակենդանացման բաժանմունքի, ընդունարանի, EMERGENCY, հոգեբուժական, նարկոլոգիական ծառայությունների բուժանձնակազմերը: 2025 թվականի սկզբից Առողջապահության ոլորտի կառավարիչները, Ազգային Ժողովի պատգամավորները պաթոսով խոսում են բուժաշխատողի բռնություն անթույլատրելության մասին և հայտնում, որ նախաձեռնել են իրավական կարգավորումներ, այլ գործիքակազմի ներդրում և այլն: Հիշեցում. 2018 թվականի հունվարի 17-ին «Հայաստանի Հանրապետության Քրեական օրենսգրքում լրացում կատարելու մասին» ՀՕ-89-Ն օրենքով ամարագրվել է Հոդված 130.1. «Բուժաշխատողների մասնագիտական, ինչպես նաև ոչ մասնագիտական օժանդակող գործունեությանը խոչընդոտելը պատժելու» վերաբերյալ հոդվածը՝ ՀՀ առողջապահության նախարարության նախաձեռնությամբ: Որից հետո 2021թվականի հուլիսի 1-ից ուժի մեջ մտած ՀՀ Քրեական օրենսգրքից հանվել է բուժաշխատողների նկատմամբ բռնություն գործադրելու կամ դրա սպառնալիքի հետ կապված 130.1 հոդվածը: Հավանաբար բժիշկների համար շատ են համարել առանձնացված պաշտպանող հոդված ունենալը ՔՕ-ում: Բայց, օրինակ՝ ՀՀ Քրեական օրենսգրքում ամրագրել են դատախազի, քննիչի, քննչական մարմնի ղեկավարի, հետաքննության մարմնի, փաստաբանի կամ ներկայացուցչի գործունեությանը ցանկացած ձևով միջամտելու պատժի մասին հոդված: Եթե իմ հիշողությունը չի դավաճանում, 2021թ. այս նույն վարչախումբն էր կառավարում, և դերակատարների փոփոխություն մինչև 2025թ. չի եղել: Հիմա կառավարությունը, Ազգային Ժողովը միանձայն՝ նախընտրական շղարշի ներքո, ՔՕ-ից հանված 130.1 հոդվածը մի քիչ այս ու այն կողմ արած կամրագրեն օրենքում: ՀՀ կառավարություն, ՀՀ Ազգային Ժողով, ՀՀ առողջապահության նախարարություն, չե՞ք ցանկանում ասել՝ սխալվել ենք, չենք էլ հասկացել 130.1 հոդվածի կարևորությունը: Նիկոլ Փաշինյան, միայն օրենսդրական փոփոխությունները բավարար չեն: Առաջարկ՝ շտապ օգնության ծառայությունը ամբողջովին վերափոխե՛ք, ՀՀ-ում ստեղծե՛ք պարամեդիկների ինստիտուը և թող կանչերը սպասարկվեն ճգնաժամային կենտրոնի կողմից՝ համակցված բրիգադներով: Հ.Գ. Սիրելի՛ բուժաշխատողներ, զգուշացե՛ք, հասարակությունը սևերի, սպիտակների, նախկինների, ներկաների բաժանելը տալիս է իր «պտուղները»»:
