«ԱՄՆ-ն պատրաստ է մասամբ համաձայնել ՌԴ-ի տարածքային պահանջներին»․ Քելլոգ

ԱՄՆ-ն պատրաստ է մասամբ համաձայնել Ռուսաստանի տարածքային պահանջներին՝ որպես ուկրաինական հակամարտության կարգավորման մաս, Fox News-ի եթերում հայտարարել է ԱՄՆ նախագահի հատուկ ներկայացուցիչ Քիթ Քելլոգը՝ նշելով, որ դա տեղավորվում է բանակցությունների տրամաբանության մեջ։
«Մասամբ՝ այո։ Որովհետև այն, ինչ անում եք, բանակցություններ վարելն է», - նշել է նա։

Քելլոգը նաև հերքել է այն ենթադրությունը, որ ԱՄՆ-ն դուրս է գալիս բանակցություններից՝ ասելով, որ ինքը չի հավատում դրան։

Նրա խոսքով՝ Լոնդոնում բանակցություններից հետո Վաշինգթոնը ստացել է 22 կոնկրետ պայման, որոնք համաձայնեցվել են Կիևի և եվրոպացի դաշնակիցների ներկայացուցիչների կողմից՝ որպես հակամարտության կարգավորման մաս։
Քելլոգը հավելել է, որ Ուկրաինայի և ԵՄ պաշտոնյաները հիմնականում հետաքրքրված են լիարժեք հրադադարով, որը կարող է հանգեցնել խաղաղության համաձայնագրի և տևել առնվազն 30 օր։
Անցյալ շաբաթ նախագահ Դոնալդ Թրամփը քննադատել էր Վլադիմիր Զելենսկուն՝ ասելով, որ Ղրիմը ռուսական չճանաչելու նրա հայտարարությունները վնասում են Մոսկվայի հետ բանակցություններին։