«Ինքնազգացողությունը վատացած մարդուն դեղատներից դուրս են հրավիրել»․ Նարինե Կիրակոսյան

Լրագրող Նարինե Կիրակոսյանի ֆեյսբուքյան գրառումը․ «Երևանի դեղատներում ինքնազգացողությունը վատացած մարդուն դուրս են հրավիրել՝ մերժելով ցուցաբերել առաջին օգնությունը։
Հարգելի՛ ընկերներ, այս գրառումը ծանոթներիցս մեկի խնդրանքով եմ անում, որովհետև սա պարսավելի մի օրինակ է, երբ մարդկայինը վերացել է մարդկանց մեջ և հատկապես առողջապահության համակարգի ոլորտի աշխատողների շրջանում։
Նկարներում՝ Դավթաշենում 1 և 3 թաղամասերի միջով անցնող Տիգրան Պետրոսյանի անվան փողոցում գտնվող դեղատներն են, ուր այսօր մի քաղաքացի մտել էր և տեղեկացնելով, որ վատ է իրեն զգում, խնդրել ճնշման ապարատով չափել իր ճնշումը։
Այդ երեք դեղատներում էլ նրան պարզապես հրավիրել են դուրս, ասելով, որ իրենք նման ծառայություն չեն մատուցում։
Ինքնազգացողությունը վատացած մարդը ոտ-ոտ մեկից մյուս այդ դեղատներով անցել, հարցրել է՝ կօգնե՞ն։
Առաջինում մերժել են, մտել է կողքինը, երրրորդից հետո էլ ավելի է վատացել ․․․
Ըստ ինձ փոխանցված տեղեկության՝ դեղատներում նույնիսկ ջուր չեն առաջարկել, թեպետ դեղատներում, ըստ իս՝ պետք է ունենալ ջրի ապառատ, կամ շշով ջուր, որ նրանց ծառայություններից օգտվող հիվանդը կարողանա դեղահաբ խմել։
Մարդուն չեն առաջարկել նաև շտապ օգնություն կանչել։
Հիմա, ինձ հետաքրքիր է, երբ մենք, լրագրողներս որևիցե խնդիր ենք վերհանում, լուսաբանում դա, ապա պետական կառույցներին և համակարգային պատասխանատուներին ենք նշում, որ թերացումները շտկվեն։ Ամեն դեպքում նման ակնկալիքով ենք հանդես գալիս մեր նյութերով։
Բա, հիմա այս դեպքում, ո՞ւմ ասենք, որ դեղատների աշխատակիցները, որոնք պետք է, ըստ տրամաբանության, բժշկական ուսումնական հաստատություն ավարտած լինեն, առնվազն դեղագործական բաժինը և Հիպոկրատի երդում տված, իրենց պահել են, ամենաքիչը՝ անմարդկային։
Ես դեռ չեմ ասում, թե ի՞նչ կանոններ պետք է դեղատնում գործեն, եթե փողոցում վատացած մեկը իրենց դուռն է բացել և օգնություն խնդրել։
Առաջին օգնությունը պետք է, որ կարողանային ցուցաբերել։ Իսկ այս դեպքում․ մարդուն ոչ թե օգնել են, այլ դռան տեղն են ցույց տվել։
Սրան ո՞նց նայենք, ո՞նց էս երևույթի դեմն առնենք»։