«Կերներդ պակասե՞լ է, ինչո՞ւ եք պառակտում քաղաքական դաշտը»․ Լևոն Ջավախյան
231
Երեկ, 03:06
Արձակագիր Լևոն Ջավախյանը ֆեյսբուքյան իր էջում գրել է․ «ԸՆԴԴԻՄԱԴԻՐՆԵՐԻՆ ԿԱՄ ԸՆԴԴԻՄԱԴԻՐ ԿՈՉԵՑՅԱԼՆԵՐԻՆ․ Էս վերջերս ականատես եմ լինում տհաճ իրողությունների։ Երկրին պատուհասած վտանգը զգացող մի շարք քաղաքական գործիչներ, թողած հիմնական թշնամուն, կատաղած, իրար միս են ուտում։ Չհասկացա, կերներդ պակասե՞լ է, ինչո՞ւ եք պառակտում քաղաքական դաշտը։ Մի՞թե ժամանակը և իրավիճակը գնահատելու տարրական ընդունակություններ չունեք... Ասացե՛ք խնդրեմ, դուք տիրոջը ծառայող հավատարիմ շնե՞ր եք, որ իրար վրա քսի են տալիս, թե՞ երկրի ճակատագրով մտահոգ քաղաքական գործիչներ։ Կարո՞ղ ա, ի վերջո, մրից դուրս գանք՝ մրջուրն ընկնենք... Հասկացե՛ք, լա՛վ հասկացեք, թշնամին մեկ է, և այդ թշնամուն թիրախավորող ցանկացած ուժ փրկարար առաքելություն ունի։ Իսկ ի՞նչ եք անում դուք. ընդամենը առուն դեռ չթռած՝ «հոպ» եք ասում... Այո՛, «հոպ» եք ասում, տորմզում եք, արգելակելով միասնական պայքարի լոկոմոտիվը... Ինչո՞ւ, խոստովանեք ինչու՞... Նիկոլը գնաց՝ հիմա էլ աթոռակռիվ եք տալի՞ս, թե՞ մեկը եղածը իրանով է արել՝ ձեզ փայ չի հասել, իսկ գուցե անձնական հաշիվնե՞ր եք մաքրում... Ո՞ւմ հաշվին, կործանվող երկրի հաշվի՞ն, քրքրվող հայրենիքի՞ հաշվին, էս խեղճ ու կրակ ժողովրդի՞ հաշվին, թե՞ էս դարդ ու ցավից պատեպատ զարկվող իմ նմանների հաշվին... Իմացե՛ք, լա՛վ իմացեք, ով էլ որ նա լինի, ինչ կուսակցությունից էլ լինի, որ գավառից, մարզից էլ լինի, ինչ կրոնի էլ պատկանի, ինչ գաղափարների էլ դավանի... եթե մարդը իսկապես պայքարի է ելել պատուհաս իշխանությունների դեմ, ապա նրա վրա քար նետողը առաջինը քար է գցում իր ժողովրդի վրա, իր ապագայի վրա, մեր նմանների վրա։ Համախմբվել է պետք և ոչ թե պառակտվել, սնվել է պետք ազգային գաղափարներով և ոչ թե միմյանց միս ու արյունով։ Իսկ եթե կերներդ պակասել է, գնացե՛ք նիկոլի մոտ, ինչքան էլ ժլատ լինի՝ էլի մի ոսկոր կգտնի ձեզ գցելու համար։ Կրծե՛ք քայքայվող երկրի հիմքերը, մանավանդ, որ հատկապես նման միջոցն է ցեմենտում փլվելու արժանի իշխանությունների երերուն ամրոցի պատերը։ Մեր գեղում ասում են, թամամ խոսքը իշին են ասում... Որոշել էի անուններ չտալ, բայց աչքիս ոնց որ բանը բանից անցնում է... Ամենևին էլ Ձեզ ավանակի տեղ չդնելով, այնուամենայնիվ Ձեզ եմ ասում՝ ՍԵՐԺԱԿԱՆՆԵՐ ԵՎ ՌՈԲԵՐՏԱԿԱՆՆԵՐ... 10.5.25թ.»։
