Ուժգին քամու հետևանքով ծառի ճյուղն ընկել է քաղաքացու գլխին

Բժիշկ Սարգիս Շիմալյանն ահազանգում է. «Այսօր 11.05.2025-ին ժամը 16։40 սահմմաններում Երևանում Քանաքեռ ՀԷԿ թաղամասի Ղափանցյան փողոցի հարակից այգում տհաճ դեպք տեղի ունեցավ ինձ հետ։ Նշված այգում զբոսնելիս, ուժգին քամու հետևանքով ծառի մի հատվածը պոկվեց ու ընկավ գլխիս։ Բարեբախտաբար ողջ եմ, սակայն ստացել եմ գլխի և մարմնի տարբեր հատվածների միջին ծանրության վնասվածքներ։

Հարց եմ ուղղում Երևանի քաղաքապետարանին՝ ո՞ւր է կանաչ տարածքների վերահսկողությունը։ Ինչո՞ւ պետք է մարդիկ քաղաքով զբոսնելիս վտանգեն իրենց կյանքը։ Ծառը կամ նրա ճյուղերը շատ վատ վիճակում էին, և ոչ մի նախազգուշացում կամ խնամք չէր իրականացվել։
Առանձնակի շնորհակալություն եմ ուզում հայտնել Երևան բժշկական կենտրոնի հերթապահ անձնակազմին՝ օպերատիվ աշխատանքի և սրտացավ վերաբերմունքի համար»: