Մահացել է Արմեն Հովհաննիսյանը

Մահացել է քաղաքական վերլուծաբան, հասարակական գործիչ Արմեն Հովհաննիսյանը: Այս մասին ֆեյսբուքյան էջում հայտնել են ընկերները: Նշվում է, որ Հովհաննիսյանն առողջական խնդիրներ ուներ, սակայն մահը վրա է հասել կաթվածի հետևանքով:

«Վերջին 12 տարում, ինչ ճանաչել եմ Արմեն Հովհաննիսյանին, նրա հետ մեր քաղաքական օրակարգերը կիսով չափ են համընկել։ Որոշ հարցերում և համընդհանուր խնդիրների առաջարկվող լուծումներում երբեմն նույնիսկ հակադիր ենք եղել։ Բայց, կարծում եմ, նույնիսկ նրա քաղաքական մտքերի ամենաանհաշտ հակառակորդներն էսօր հիշելիս կառանձնացնեն նրա պարկեշտությունը, ազնվությունը, իր ճշմարտությունը պաշտպանելու սկզբունքայնությունն ու յուրահատուկ նուրբ հումորը։
Նա քաղաքական ակտիվի էն սերնդից էր, որոնց համար ինտելեկտուալ բանավեճը ոչ միայն դեռ հնարավոր էր, այլև պայքարի հիմնական գործիք։ Սերնդից, որի գործունեության հիմքը լավ, թե վատ գաղափարներն էին։ Արմենն էդ սերնդի էն եզակի ներկայացուցիչներից էր, որի պայքարն անանձնական էր, որն իր գաղափարները որևէ կերպ քաղաքական առուծախի առարկա չդարձրեց։ Իմ քաղաքական աչքերը բացելու պահին Արմենն արդեն փողոցում էր՝ ի՛ր բարիկադներին, ի՛ր կարմիր գծերը պաշտպանելիս, որտեղ և մնաց մինչև կյանքի վերջին օրը։ Էդ բարիկադներից ամենաամուրը մի կարմիր գծի վրա էր, որը հայկական ինքնության առանցքային բաղադրիչի՝ հայոց լեզվի, պաշտպանության բարիկադի անունը կկրեր։ Էդ հարցում նրա նախանձախնդրությունը տպավորիչ էր։
Ու էլի՝ չնայած շատ հարցերում չի, որ մենք իրար գաղափարակից կհամարեինք, բայց նրա մահվան լուրը լսելով տպավորություն էր, որ հենց ինձնից մի մաս պակասեց։ Անկեղծորեն կիսում եմ Արմենի հարազատների ու մերձավորների անդառնալի կորստի ցավը»,- գրել է հասարակական, քաղաքական գործիչ Սուրեն Սահակյանը։

«Խորը ցավով տեղեկացա մեր սիրված ընկերոջ, ազգին անմնացորդ նվիրված հայորդի Արմեն Հովհաննիսյանի մահվան մասին։ Ցանկանում եմ իմ խորին ցավակցությունը հայտնել Արմենի ընտանիքին, հարազատներին և բոլոր ընկերներին»,- գրել է հասարակական գործիչ Գիորգի Թումասյանը:

«Աննկարագրելի Մարդկային տեսակ էր, մեծ սրտի տեր, իր երկիրը շատ էր սիրում, լավ լուրերով շատ էր ուրախանում, արտաքին քաղաքականության տարատեսակ փոփոխություններից միշտ մտահոգվում էր, մի խոսքով կարող եմ վստահ ասել, որ Հայաստանի Հանրապետության N1 կրթված և ինտիլիգենտ վերլուծաբանն էր, աշխարհի պատմությունը Հայոց այբուբենից լավ գիտեր։ Ամենա կոմպետենտ վերլուծաբանին Հայ ազգը կորցրեց։ Արմենը ամուսնացած էր, ուներ 2 անչափահաս երեխաներ։ Արմեն ջան, Աստված հոգիդ լույսերի մեջ պահի։ Ես քեզ համար հաճախ կաղոթեմ։ Ափսոս, շատ ափսոս, գրում եմ և չեմ հավատում, բայց կյանք է, ոչ ոք չգիտի, թե առավոտյան իր համար արեգակը կբացվի, թե չի բացվի»,- գրել է ընկերներից Հայկ Թորոյանը: