«Քաղաքապետարանի առջևի թավշյա սիզամարգի տեղում հիմա անհամադրելի բույսեր են»․ Քրիստինա Վարդանյան

Երևանի ավագանու «Ազգային առաջընթաց» խմբակցության անդամ Քրիստինա Վարդանյանի ֆեյսբուքյան գրառումը․ «Կարմիր, դեղին, գազարագույն, թե՞ թավշյա կանաչ։
Ճարտարապետությունն իր մեղեդին ունի, կարևոր է աղմուկով չխանգարել։
Քաղաքապետարանի շենքի առջևի նախկին թավշյա սիզամարգը հենց այդպես էր աշխատում՝ պարզ, կանաչ հարթություն, որ շեշտում էր շենքի հզոր ճարտարապետությունը, տալիս էր հանգիստ ու արժանապատիվ տեսք։
Հիմա այդ տեղում խայտաբղետ բույսեր են՝ գունավոր, անհամադրելի, շփոթեցնող։ Աչքը մոլորվում է, շենքը մղվում է ետին պլան։ Ո՛չ ճաշակ, ո՛չ գրագիտություն։ Ծաղկային ձևավորումն իր օրենքներն ունի, համաձայն որի, ծաղկանոցը տարածքի 2-5% պետք է կազմի, գույներից չեմ էլ խոսում… Եվ ամենակարևորը՝ չկա հարգանք տարածքի հանդեպ։
Ամեն «նախկին» որոշում չէ, որ պետք է փոխեք։ Ցավում եմ, որ լանդշաֆտային ճարտարապետության և կանաչապատման այս պարզ օրենքները դեռ ապացուցել է պետք»։