«Անչափահասների շրջանում նկատվող ագրեսիայի դեպքերը միջոցներ ձեռնարկելու կարիք ունեն»․ Իզաբելլա Աբգարյան

Երևանի ավագանում անդամ Իզաբելլա Աբգարյանի ֆեյսբուքյան գրառումը․ «Անչափահասների և երիտասարդների շրջանում հատկապես վերջին ժամանակներս նկատվող դաժանության, ագրեսիայի դեպքերը շատ լուրջ հետևությունների և միջոցների ձեռնարկման կարիք ունեն։
Մի մոռացեք, որ գործ ունենք սերնդի հետ, ում դեռևս փխրուն ներաշխարհը պատերազմով է անցել՝ իր բոլոր դաժան պատկերներով, լուրերով, որ մեծերին էր հոգեխանգարման հասցնում ... Իսկ երեխաների համար դա շատ ավելի ծանր բեռ եղավ, որովհետև եթե մեծերը արտահայտվում էին, գոռում, անիծում, երեխաներից շատերը այդ սարսափին լուռ հետևողներն էին։
Չեմ մոռանում, որ այդ ծանր օրերին, երբ նստեցինք ընթրիքի ու միացրեցինք ռազմական իրավիճակի հերթական ներկայացումը, տղաս, որ մինչ այդ լուռ էր, չդիմացավ ու խնդրեց անջատել և գոնե սեղանի շուրջ պատերազմից չխոսել։
Իսկ պարտված, «կրված» լինելու բարդույթն էլ ավելի ծանր են տանում հատկապես տղաները։
Գրքեր, երաժշտություն, սպորտ, արշավներ ու ընտանեկան ջերմ մթնոլորտ ... Այս ամենը գործիքներ են, որ պիտի կիրառվեին երեխաներին սթրեսից հանելուն։ Բայց քանի՞ ծնող մտածեց երեխայի ապրումների մասին, քսնի՞սն են այսօր տանը իրենց ագրեսիան կամ ընկաճվածությունը կառավարում, որ երեխայի վրա չազդի։
Այստեղ աշխատանք ունեն թե՛ ծնողները, թե՛ մանկավարժները, թե՛ պետությունը, որ վաղը գլխներիս չտանք»։