«Ձգտում ենք ընդլայնել ՀՀ հնարավորությունները, որպեսզի ստիպված չլինեք լիովին կախված լինել ՌԴ-ից»․ Կայա Կալաս

«Եթե նայենք Եվրոպայի քարտեզին, ակնհայտ կլինի, որ բոլորիս համար շահեկան է, եթե համագործակցենք միմյանց հետ, իհարկե այս որոշումը Հայաստանի ժողովրդինն է: Այս մասին Հանրային հեռուստաընկերությանը տված հարցազրույցում հայտարարել է ԵՄ արտաքին գործերի ու անվտանգության քաղաքականության հարցերով բարձր ներկայացուցիչ Կայա Կալասը՝ պատասխանելով այն հարցին, թե արդյոք Հայաստանին սպասում են ԵՄ-ում, թե ոչ:

«Ճիշտ է՛, որոշ անդամակցության գործընթացներում մենք բավականին դանդաղել ենք, թեկնածու երկրները չափազանց երկար են սպասել, և մենք փորձում ենք այդ գործընթացներն արագացնել, քանի որ փորձում ենք այդ երկրներին հնարավորություն տալ մուտք գործել մեր ներքին տնտեսական շուկաներ:

Ինչ վերաբերում է Հայաստանին, ապա Հայաստանը մեր անմիջական հարևանն է, և մեր շահերից է բխում, որ մեր հարևանությունը զարգանա, Հայաստանն առաջընթաց ունենա, և լինի տնտեսական աճ և բարեկեցիկ կյանք մարդկանց համար: Այդ իսկ պատճառով մենք փորձում ենք Հայաստանի հետ որքան հնարավոր է սերտորեն աշխատել: Մենք պատրաստ ենք ուսումնասիրել նաև նոր հնարավորություններ՝ տեսնելու, թե էլ ինչ կարող ենք անել միասին»,-ասաց նա:

Անդրադառնալով դիտարկմանը, որ Հայաստանը մեծ կախվածություն ունի Ռուսաստանից և ընդդիմադիրները նշում են, որ դեպի Եվրոպա գնալը Հայաստանի համար լի է ռիսկերով, ՀՀ տնտեսությունը կկանգնի ճգնաժամի առջև, Կալլասը նշել է. «Այն որ ռուսները սպառնալիքներ են հնչեցնում, նորություն չէ: Մենք դա տեսել ենք նաև աշխարհի այլ հատվածներում: Կարծում եմ՝ այստեղ պետք է հստակ լինի, թե ինչ է ուզում անել հենց ինքը՝ հայ ժողովուրդը: Կախվածությո՞ւն ունենալ այնպիսի երկրներից, որոնք գուցե այնքան էլ բարեկամական չեն, բարդ է։ Նաև այդ պատճառով է պետք տնտեսության դիվերսիֆիկացումը: Մենք ևս շահագրգռված ենք տարածաշրջանային կապուղիների զարգացման հարցում, և ձգտում ենք ընդլայնել Հայաստանի հնարավորությունները, որպեսզի դուք ստիպված չլինեք լիովին կախված լինել միայն Ռուսաստանից: Եթե այդպես եք ցանկանում՝ ընտրությունը ձերն է: Բայց մենք տեսել ենք, թե ինչպես կարող է տնտեսական կախվածությունը նաև կիրառվել ընդդեմ այդ երկրների: Այդ պատճառով անհրաժեշտ է կապ հաստատել բարեկամ երկրների հետ, որովհետև մյուս կողմից կարող են փորձել վնաս հասցնել ձեզ»։