«Վերջ ենք տալու ֆեյքային ոհմակներին»․ Նորիկ Նորիկյան

«Արդար Հայաստան» կուսակցության նախագահ, փաստաբան Նորիկ Նորիկյանի ֆեյսբուքյան գրառումը․ «Երբ գործող ու նախկին իշխանություններին սատարող մոլեռանդ ֆեյքերը հոշոտելու մոլուցքով հարձակվել են քո վրա, ուրեմն դու ճիշտ ուղու վրա ես․․․
Երբ քեզ հարվածում են գործողներն ու չգործողները, ներկաներն ու նախկինները, ահաբեկչական հակումներ ունեցող որոշ շրջանակներ ու նրանց կամակատարներ, երբ քեզ մեղադրում են և՛ նալին, և՛ մեխին խփելու մեջ, երբ չեն կողմնորոշվում, թե դու սև ես, թե՞ սպիտակ, երբ քեզ պարտադրում են կողմնորոշվել գործող ու նախկին իշխանությունների սարքած քաղաքական ԿԱՄ-ԿԱՄ-ի մեջ, երբ որոշները պարտադրում են քեզ կողմնորոշվել՝ Նիկոլի կողմից ես, թե Քոչարյանի ու Սերժի, երբ պարտադրում են քեզ կողմնորոշվել՝ Ռուսամետ թե, թե Արևմտամետ, ուրեմն ամենակարևոր հարցերում դու չես սխալվել։
Ցավոք սրտի, մեր հասարակության մի ստվար զանգված այդպես էլ չի ցանկանում ընկալել, որ քաղաքականության մեջ հնարավոր է դրսևորել ինքնաբավ քաղաքական վարքագիծ, չլինել որևէ մեկի ազդեցության տակ, անհրաժեշտ պահին ամենախիստ ձևով անդրադառնալ թե՛ գործող, թե՛ նախկին իշխանություններին։
Սիրելի՛ Բարեկամներ
Գործող իշխանության գործունեությանն ես անդրադառնում՝ Նիկոլին պաշտող ֆեյքային ոհմակն է հարձակվում, Սերժի գործունեությանն ես անդրադառանում՝ նրան պաշտպանող ֆեյքային ոհմակն է հարձակվում, Քոչարյանի կառավարման շրջանին ես անդրադառնում, վերջինիս պաշտպանող ֆեյքային ոհմակն է հարձակվում։
Լսե՛ք, Դուք այս ինչքա՞ն նման եք իրար։
Լա՛վ, որքա՞ն կարելի է թաքնվել ֆեյքի տակ ու փորձել տպավորություն ստեղծել, թե Դուք անհրաժեշտ ու Ձեզ ցանկալի վստահությունն ունեք։
Դուք իսկապես չեք ուզում գիտակցել, որ Ձեր իսկ գործունեությամբ մեր կյանքը վերածել եք ֆեյք իրականության։
Ձեր ֆեյք կառամարման արդյունքում էլ ասքան տարիների ընթացքում ստեղծեցինք ֆեյք պետություն, ֆեյք իշխանություն, ֆեյք կառավարման համակարգ, ու այսօր քաղում ենք դրա դառը պտուղները․․․
Մի բան հաստատ խոստանում եմ՝ առաջին իսկ հնարավորության դեպքում վերջ ենք տալու բոլոր ֆեյքային ոհմակներին, իսկ դրանց իրական տերերը պատասխան կտան մեր պետությունը կործանելու համար․․»: