«Իրանում ջրամբարների ջրային պաշարները նվազագույն ցուցանիշի են հասել»․ Վարդան Բալյան

Քաղաքական վերլուծաբան Վարդան Բալյանի ֆեյսբուքյան գրառումը․ «Իրանում ջրամբարների ջրային պաշարները պատմականորեն նվազագույն ցուցանիշի են հասել։ Թեհրանի ջրամատակարարման գլխավոր հանգույցներից Քարաջի ջրամբարում, որ կառուցվել է դեևս վերջին շահի օրոք 1958-1963 թվականներին և իրանական մայրաքաղաքի ջրի հիմնական աղբյուրն է, համարյա ջուր չկա: Կապուտան/Ուրմիա լիճը, որի խորությունը հասնում էր 10 մետրի, ծանծաղել է այն աստիճան, որ կարելի է քայլելով մեկ ափից մյուս ափ անցնել՝ ջրի մակարդակը ծնկներից ներքև է: Երկրի 31 նահանգներից 24-ում ջրային դեֆիցիտով պայմանավորված ճգնաժամային իրավիճակ է ձևավորվել, որ խորանալու միտում ունի, քանի որ առաջիկայում տեղումներ չեն կանխատեսվում: Էներգետիկայի նախարար Աբաս Ալի Աբադին հրապարակավ ընդունել է, որ իրավիճակը մոտ է կատաստրոֆիկ բնութագրման՝ ափսոսանք հայտնելով, որ խնդրի լուծումը հնարավոր է միայն գրունտային ջրերի օգտագործման ծավալների էական ավելացման շնորհիվ, ինչն անխուսափելիորեն բնապահպապանակն լրջագույն հետևանքներ է ունենալու ապագայում: Սոցմեդիա օգտատերերը զանգվածային հաղորդումներ են ներկայացնում համացանցային տիրույթում տևական ջրաանջատումների մասին՝ համեմելով խոսուն մեկնաբանություններով՝ Իսլամական ռեժիմի վերջին շունչն է:
Իրանում և նրա շուրջ զարգացող իրավիճակը, որ միանշանակ կարելի է բնութագրել որպես լրջագույն ջրային, էներգետիկ, տնտեսական, ֆինանսական նաև քաղաքական ճգնաժամ՝ խորացման միտումներով, պետական պատկան մարմինները պետք է հրատապ կարգով վերցնեն մշտադիտարկման ու արդեն այս փուլում սկսեն մշակել գործողությունների ծրագիր դեպի Հայաստանի Հանրապետություն միգրացիոն հոսքերի էական ծավալներով հնարավոր և կանխատեսելի ավելացման հետ կապված»: