«Հունվարի 27-ին կխոնարհվենք երկնային բանակի առաջ, հունվարի 28-ին կտոնենք երկրային բանակի օրը»․ Ռուբեն Ռուբինյան

«Հունվարի 28-ը Հայոց բանակի օրն է և պայմանավորել դրանով կամ դրա նախորդ օրով հիշատակի օրը՝ չեք գտնո՞ւմ, որ դրանով նսեմացնում եք թե՛ Բանակի օրը, թե՛ հիշատակի հավերժացումը»,- այսօր ԱԺ պետական-իրավական հարցերի մշտական հանձնաժողովի նիստի ժամանակ ասաց «Հայաստան» խմբակցության պատգամավոր Արծվիկ Մինասյանը՝ անդրադառնալով հունվարի 27-ը Հիշատակի և խոնարհումի օր սահմանելու նախագծին։

«Լավ, չեմ հասկանում, պրոբլեմը ո՞րն է, ինչպես ասում էր Նազարյանը՝ մենք ունենք երկնային բանակ, այսինքն՝ բոլոր տարիների զոհերը, և կա երկրային բանակ։ Հունվարի 27-ին կհիշենք, կխոնարհվենք երկնային բանակի առաջ, հունվարի 28-ին կտոնենք մեր երկրային բանակի օրը։ Որևէ խնդիր չկա»,- ի պատասխան ասաց հիմնական զեկուցող, ԱԺ փոխնախագահ Ռուբեն Ռուբինյանը։