«Անկլավների փոխանակությունը հավելյալ բարդություններ է ստեղծելու». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Գրեթե կասկած չունեմ, որ Հայաստանը Ադրբեջանին է վերադարձնելու խորհրդային տարիներից անկլավներ Տիգրանաշեն-Քյարքին, Սոֆուլու-Բարխուդարլուն և Վերին Ոսկեպար-Յուխարը Ասկիպարան:
Տրամաբանորեն, Ադրբեջանն էլ Հայաստանին է վերադարձնելու Արծվաշենը: Հուսամ:
Այս փոխանակումները, մեղմ ասած, շահեկան չեն Հայաստանի ապագայի համար:
Վտանգը միայն այն չէ, որ Հյուսիս-Հարավ ճանապարհի երկու հատվածներ՝ Հայաստան-Իրան և Հայաստան-Վրաստան մայրուղիները դառնում են խոցելի:
Ստացվում է, որ Ադրբեջանը Հայաստանի տարածքում ունենալու է չորս գյուղ, իսկ մենք Ադրբեջանի տարածքում՝ մեկ գյուղ:
Ռազմավարական կարևորության իմաստով՝ Արծվաշենը անհամեմատելի է և՛ Տիգրանաշեն-Քյարքիի, և՛ Սոֆուլու-Բարխուդարլուի, և՛ Վերին Ոսկեպարի հետ:
Եթե նույնիսկ Հայաստանն ու Ադրբեջանը վերջնականապես որոշել են խաղաղ ապրել, անկլավների փոխանակությունը հավելյալ բարդություններ է ստեղծելու:
Ես դեռ մի կողմ եմ թողնում, որ ադրբեջանցիները վերադառնալու են իրենց բնակության նախկին վայրեր, բայց վստահ չեմ, որ հայերը վերադառնալու են:
Շատ կուզենայի այս վերջին հարցում չարաչար սխալվել:
Ի դեպ, խորհրդային տարիներին Հայաստանի և Ադրբեջանի, այդ թվում՝ Նախիջևանի հատվածում, տեղի են ունեցել տարածքային փոխանակումներ, որոնց արդյունքում են նաև ձևավորվել անկլավները: Ու ոչ միայն անկլավները:
Այսպես, Որոտանի հարևան Շահվերդիլար գյուղը, որը 2020 թվականի դեկտեմբերին Էյվազլիի հետ անցավ Ադրբեջանին, Խորհրդային Հայաստանի կազմում է եղել և 1926 թվականի մարդահամարի արդյունքերը նշված են Հայաստանի ցուցակներում:
Հետագայում գյուղն անցել է Կուբաթլուի շրջանին»: