«Սա վկայում է Իրանի շուրջ էսկալացիայի վտանգի պրակտիկության մասին». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրաառումը. «Երբ Չինաստանն է իր քաղաքացիներին դիմում Իրանը լքելու հորդորով, նաեւ խորհուրդ է տալիս չպլանավորել ճամփորդություն դեպի Իրան, ապա դա վկայում է Իրանի շուրջ էսկալացիայի վտանգի պրակտիկության մասին:

Միաժամանակ, այս հանգամանքը կարծես թե հակասության մեջ է Ժնեւում նախօրեին կայացած բանակցությունից հետո արված հայտարարությունների հետ: Մասնավորապես, հայտարարվեց, թե բանակցությունը կառուցողական էր, կար առաջխաղացում եւ անգամ ասվեց, որ մեկ շաբաթ անց կլինի տեխնիկական խմբերի մակարդակով քննարկում, բացի քաղաքական բանակցությունից:

Մյուս կողմից սակայն, ինչպես մի քանի անգամ արտահայտվել եմ գրառումներում, էսկալացիան ամենեւին միշտ չէ, որ կարող է լինել բանակցության փակուղու կամ տապալման հետեւանք: Այն կարող է լինել նաեւ կառավարելի պրոցես, որի «պարամետրերը» մշակվել են հենց բանակցության տողատակով: Կառավարելի էսկալացիա, որը կարող է բավարարել բոլորին, թույլ տալով յուրաքանչյուր կողմի կամ մասնակցի իր համար լուծել հարցեր:

Երբեմն կան քաղաքական հանգուցալուծումներ, որոնց իմպլեմենտացիայի հարցում չի գտնվում ավելի լավ գործիք, քան ռազմականը»: