Սիրիայում սկսվել է ԴԱԻՇ-ի դեմ հատուկ գործողություն

745

Կիրակի, 14 դեկտեմբերի, 2025 թ., 22:46

Սիրիայի անցումային կառավարության անվտանգության ուժերը գործողություն են սկսել ԴԱԻՇ ահաբեկչական խմբավորման դեմ Հոմս նահանգի և Սիրիական անապատի մի քանի շրջաններում՝ Պալմիրայում սիրիա-ամերիկյան համատեղ պարեկախմբի վրա հարձակումից հետո:
Գործողությունն ուղղված է Սիրիական անապատի արևելյան և հարավարևելյան շրջաններում թաքնված՝ ԴԱԻՇ-ի հետ կապված զինյալների դեմ։

Միևնույն ժամանակ, «Սիրիա» հեռուստաընկերությունը հայտնել է, որ ԱՄՆ-ի գլխավորած միջազգային կոալիցիան ձերբակալությունների արշավ է անցկացնում Պալմիրայում և նրա շրջակայքում՝ կրակոցների միջադեպից հետո։

Հիշեցնենք, որ շաբաթ օրը զինված անձը կրակ է բացել սիրիա-ամերիկյան համատեղ պարեկախմբի վրա՝ սպանելով երկու ամերիկացի զինծառայողի և մեկ ամերիկացի քաղաքացիական թարգմանչի։ Նրանց մարմինները ամերիկյան ուղղաթիռներով տեղափոխվել են միջազգային կոալիցիայի ռազմական բազա Դամասկոսից մոտ 250 կմ հեռավորության վրա գտնվող ալ-Թանֆ շրջանում։

Սիրիայի ներքին գործերի նախարարության խոսնակի խոսքով՝ հարձակվողը անվտանգության ուժերի անդամ էր, բայց հրամանատարական դիրք չէր զբաղեցրել։ Նա չեզոքացվել է փոխհրաձգության ժամանակ։ Այժմ իշխանությունները հետաքննում են՝ արդյոք նա կապված է եղել ԴԱԻՇ-ի հետ, թե՞ հավատարիմ է եղել ահաբեկչական կազմակերպության գաղափարախոսությանը։