Վրաստանում «գողական աշխարհի» հետ կապ ունեցող 49 մարդ է ձերբակալվել

Վրաստանի Ներքին գործերի նախարարությունը ձերբակալել է «գողական աշխարհի» հետ կապված 49 անձի և հեռակա կարգով քրեական հետապնդում է սկսել 14 անձի նկատմամբ, այդ թվում՝ 5 «օրենքով գողի»: Այս մասին «Գրուզիա օնլայն»-ի փոխանցմամբ ճեպազրույցի ժամանակ հայտարարել է Ներքին գործերի փոխնախարար Ալեքսանդր Դարախվելիձեն:

Դարախվելիձեի խոսքով՝ նրանք մեղադրվում են «գողական աշխարհին անդամակցելու», «գողական հանդիպմանը մասնակցելու», «գողական աշխարհի գործունեությանը աջակցելու» և «գողական աշխարհի անդամի հետ կապ հաստատելու» մեջ։ Ձերբակալվածների մեծ մասը նախկինում դատապարտվել էր տարբեր ծանր հանցագործությունների համար։