«Հայաստանի խաղաղությունն Արևմուտքին պե՞տք է». Սևակ Հակոբյան

Լրագրող, խմբագիր Սևակ Հակոբյանի ֆեյսբուքյան գրառումը. «Այս օրերին տեղի են ունենում ակտիվ բանակցություններ ռուս-ուկրաինական հակամարտության կարգավորման վերաբերյալ։ ԱՄՆ նախագահ Դոնալդ Թրամփի հետ հանդիպումից հետո Ուկրաինայի նախագահ Զելինսկին հայտարարեց, որ 20 կետանոց խաղաղության ծրագիրն արդեն 90%-ով համաձայնեցված է։ Ասաց, որ ԱՄՆ-ի կողմից անվտանգության երաշխիքները 100%-ով համաձայնեցված են։ Թրամփը հայտարարել է, որ Ուկրաինայի անվտանգության երաշխիքների մեծ մասը կստանձնի Եվրոպան, Միացյալ Նահանգները կօգնի։
Խաղաղության գործընթացում երաշխիքներն ամենակարևորն են․ երաշխիքները, պատասխանատվությունն այդ երաշխիքների խախտման դեպքում, ինչպես նաև կողմերի պատասխանատվությունը։
Գանք մեզ․ ԱՄՆ նախագահ նույն Թրամփը այս տարվա օգոստոսի 8-ին Վաշինգտոնում հյուրընկալեց Հայաստանի և Ադրբեջանի ղեկավարներին․ նախաստորագրեցին ինչ-որ փաստաթուղթ՝ անունը դնելով «խաղաղության պայմանագիր»։ Սակայն, ի տարբերություն մյուս պայմանագրերի, այստեղ ընդհանրապես խոսք չկա երաշխիքների մասին։ ԱՄՆ նախագահն ուղղակի որպես տանտեր մասնակցել է, բայց չի երաշխավորում ոչնչում։ Ուկրաինայի պարագայում երաշխավորողը Հայաստանի պարագայում ասում է՝ WhatsApp-իս համարը տալիս եմ, պետք լինի՝ զանգեք։
Միակ փաստաթուղթը Հայաստանի պարագայում, որ ունեցել է երաշխիք, եղել է նոյեմբերի 9-ի հայտարարությունը, որտեղ երաշխավոր էր հանդես գալիս ՌԴ-ն՝ ուղարկելով խաղաղապահներ։ Սակայն դա գործեց մինչև 2022թ․ հոկտեմբերը, երբ Հայաստանի անունից բանակցողը Պրահայում Մակրոն-Միշելների աջակցությամբ Արցախը ճանաչեց Ադրբեջանի մաս, և եղավ հայտնի ու ողբերգական ավարտ ունեցող շրջափակումը։
Հիմա նույն Եվրոպան, որն իր վրա է վերցնում ուկրաինական ճակատում երաշխավորությունը, «Հայկական ճակատում» քաշվել է մի կողմ։
Հարց՝ իսկ Հայաստանի խաղաղությունն Արևմուտքին պե՞տք է։ Չէ՞ որ մեր տարածաշրջանում նրանց հետաքրքրությունը լրիվ այլ է։ Թե մեզ հետ ինչ կլինի, չունի որևէ նշանակություն իրենց համար, կարևորը՝ մեր իշխանությունը գործի Ռուսաստանի դեմ»: