«Սպանում են միմյանց, որովհետև տարրական խոսել չգիտեն»․ Զառա Հովհաննիսյան

Իրավապաշտպան, հրապարակախոս Զառա Հովհաննիսյանի ֆեյսբուքյան գրառումը. «Ինչո՞ւ են տղամարդիկ միմյանց սպանում, անունն էլ դնում են պատվի, արժանապատվության ու տղամարդկության համար։ Մի քանի օր առաջ հերթական պատմությունն էի լսում։ Սկսվել էր, ինչպես միշտ, «չնչին խոսքից»։ Մի նկատողություն, մի վիրավորական արտահայտություն, հետո՝ ձայնը բարձրացել է, հետո՝ ձեռքերը, հետո՝ զենքը։ Եվ ամեն անգամ մի երիտասարդ տղամարդ տուն չի վերադարձել։
Հովհաննես Թումանյանի «Մի կաթիլ մեղրը» պատմվածքում ամեն ինչ սկսվում էր հենց մեկ կաթիլից։ Սկիզբը մեղր էր, վերջը՝ արյուն։ Մեր օրերում այդ «կաթիլը» մի բառ է, մի հայացք, իսկ շղթան նույնն է։ Եվ հետո բոլորը զարմանում են, թե ինչու հասավ էս աստիճանին։ Տղամարդիկ սպանում են միմյանց, որովհետև տարրական խոսել չգիտեն, որովհետև ուժը շփոթել են բռնության հետ, արժանապատվությունը՝ վրեժի։ Տղամարդը գիտի ինչպես հարվածել, բայց չի սովորել ինչպես խոսել»։