«Ուկրաինայում խաղաղությունը կարող է հաստատվել մի քանի շաբաթվա ընթացքում». Դոնալդ Տուսկ

Ուկրաինայում խաղաղությունը կարող է հաստատվել մի քանի շաբաթվա ընթացքում, երեքշաբթի օրը հայտարարել է Լեհաստանի վարչապետ Դոնալդ Տուսկն այլ եվրոպական առաջնորդների, Կանադայի և ՆԱՏՕ-ի հետ բանակցություններից հետո։
Ըստ Reuters-ի, Տուսկն այս հայտարարությունն արել է՝ չնայած Կրեմլի կողմից հայտարարված՝ բանակցային դիրքորոշումը խստացնելու մտադրությանը: Հիշեցնենք՝ Մոսկվան մեղադրում է Կիևին Ռուսաստանի նախագահական նստավայրի վրա հարձակման մեջ, մեղադրանք, որը Ուկրաինան անվանել է անհիմն:

«Խաղաղությունը հորիզոնում է։ Կասկած չկա, որ տեղի են ունեցել իրադարձություններ, որոնք հիմք են տալիս հույս ունենալու, որ այս պատերազմը կարող է ավարտվել, և բավականին արագ, բայց դա դեռևս հույս է, որը հեռու է 100 տոկոս հաստատումից։

Երբ ես ասում եմ, որ խաղաղությունը հորիզոնում է, ես նկատի ունեմ առաջիկա շաբաթներին, ոչ թե ամիսներին կամ տարիներին։ Մինչև հունվար մենք բոլորս պետք է հավաքվենք... որոշումներ կայացնելու Ուկրաինայի ապագայի, աշխարհի այս մասի ապագայի վերաբերյալ», - ասել է Տուսկը կառավարության նիստում։

Ըստ Տուսկի, Միացյալ Նահանգների կողմից Կիևին առաջարկվող անվտանգության երաշխիքները հիմք են տալիս հույս ունենալու պատերազմի արագ ավարտի համար, բայց Ուկրաինան ստիպված կլինի «զիջումների» գնալ տարածքային հարցերում։