Բալթիկ ծովում կրկին կապի մալուխ է վնասվել

Լատվիայի իշխանությունները հայտնել են Բալթիկ ծովում կապի մալուխի վնասման մասին, և ոստիկանությունը հետաքննություն է սկսել:

Reuters-ը, հղում անելով Լատվիայի պետական ​​ոստիկանությանը, հաղորդում է, որ մալուխը վնասվել է հունվարի 2-ին՝ երեք օր անց այն բանից հետո, երբ Ֆինլանդիայի իշխանությունները ձերբակալել էին Ռուսաստանից մեկնող նավ, որը կասկածվում էր Բալթիկ ծովում մեկ այլ մալուխի վրա հարձակմանը մասնակցելու մեջ: «Ներկայում ո՛չ նավը, ո՛չ էլ դրա անձնակազմը չեն ձերբակալվել. նրանք համագործակցում են ոստիկանության հետ, և ակտիվ աշխատանքներ են տարվում միջադեպի հանգամանքները պարզելու համար»,- ասվում է ոստիկանության հայտարարության մեջ:

Լատվիայի ափային պահպանության ծառայության հաղորդագրության համաձայն՝ ստուգված նավը սկզբում շարժվում էր չգործող մալուխի վրայով, բայց հետո փոխել է ուղղությունը դեպի ակտիվ, այժմ վնասված մալուխը, հաղորդում է Delfi-ն: Հետաքննության ընթացքում ոստիկանությունը զննել է նավը և դրա խարիսխը, ստուգել տեխնիկական սարքավորումները և նավամատյանները, ինչպես նաև հարցաքննել է մի քանի անձանց։ Հետաքննությունը շարունակվում է։

Լիտվայի ազգային ճգնաժամային կառավարման կենտրոնը պարզաբանել է, որ մալուխն անցնում է Լիտվայի Սվենտոջի և Լատվիայի Լիեպայա ափամերձ քաղաքների միջև, որոնք գտնվում են միմյանցից մոտավորապես 65 կիլոմետր հեռավորության վրա։

Հունվարի 1-ին Ֆինլանդիայի ոստիկանությունը հայտնել էր «Ֆիտբուրգ» նավի անձնակազմի երկու անդամների ձերբակալության մասին, որը կասկածվում է Հելսինկիի և Տալլինի միջև մալուխը վնասելու մեջ։