Ալեն Սիմոնյանը՝ լրագրողներին քաշքշելով հեռացնելու միջադեպի մասին

Արդեն հայտնել էինք ՊՊԾ աշխատակիցների կողմից «Ժողովուրդ»-ի լրագրողներին ԱԺ շենքից հեռացնելու մասին։

Ավելի ուշ, լրագրողների հետ ճեպազրույցում, անդրադառնալով տեղի ունեցածին, Ալեն Սիմոնյանն ասաց․ «Սևով սպիտակի վրա գրված է՝ ով կարող է ներկա լինել հանձնաժողովի նիստին։ Լրագրողները, ովքեր հավատարմագրված չեն, զրկվել են, չեն կարող էնտեղ գտնվել։ Նպատակը՝ գալ, լուր տա՞լն է, թե՞ սեփական անձի շուրջ սկանդալ սարքելը։ Կարգ գոյություն ունի, որը խախտվել է»։ Հարցին՝ իսկ ինչու են զրկվել, որովհետև Հայկ Կոնջորյանին հարց են տվել, որը նրան դուր չի եկե՞լ, ասաց․ «Նորից վերադառնում ենք էն բանին, ինչի մասին խոսում էի։ Դուք ասում եք այն, ինչ որ ձեր կարծիքն է»։

Հիշեցնենք՝ ավելի վաղ «Ժողովուրդ»-ը գրել էր, որ «Նախորդ տարի ՔՊ խմբակցության ղեկավար Հայկ Կոնջորյանին ԱԺ միջանցքում՝ սահմանված վայրում հարց տալու համար ԱԺ աշխատակազմի ղեկավար Դավիթ Առաքելյանը զրկել է օրաթերթի լրագրողներին ԱԺ հավատարմագրից: Հիմա հարցը գտնվում է դատարանում:
Այսօր օրաթերթի ներկայացուցիչներն ԱԺ ընդդիմադիր պատգամավոր Գեղամ Մանուկյանի հրավերով ԱԺ էին գնացել: ԱԺ աշխատակազմի ղեկավար Դավիթ Առաքելյանը անձամբ մտավ Պաշտպանության հարցերի հանձնաժողովի նիստերի դահլիճ և պահանջեց, որ Անդրանիկ Քոչարյանը՝ որպես վարող հեռացնի լրագրողներին դահլիճից: Ապա ՊՊԾ աշխատակիցներին հրահանգեց դուրս հանել լրագրողներին, աշխատակիցները մի քանի անգամ քաշքշելով, ֆիզիկական ցավ պատճառելով՝ լրագրողներին հեռացրեցին ԱԺ-ից»։