«Հաղորդումն իրավապահներին ներկայացրել է Ալեն Սիմոնյանը և նրան է պետք հարցեր տալ»․ Ժաննա Ալեքսանյան

Իրավապաշտպան Ժաննա Ալեքսանյանը ֆեյսբուքյան էջում գրել է․ «Քիչ առաջ ստիպված էի լսել Ալեն Սիմոնյանի ճեպազրույցն այն հույսով, որ լրագրողներ հարցեր կուղղեն նրան Նարեկ Սամսոնյանի ապօրինի բանտարկության հետ կապված, հատկապես որ հացադուլի 11-րդ օրն է և առողջական խնդիրներ ունի։ Հաղորդումն իրավապահներին ներկայացրել է Ալեն Սիմոնյանը և նրան է պետք հարցեր տալ։ Օրինակ, թե ինչու է Նարեկ Սամսոնյանին և Վազգեն Սաղաթելյանին «շան լակոտներ ու լածիրակ» անվանել (որից հետո պատասխան է ստացել), արդյոք նրա միջամտությամբ է, որպես բարձրաստիճան պաշտոնյա, տղաներին կալանավորելն ու հետագայում կալանքը 3 ամսով երկարաձգելը։ Եվ մի հարց էլ, որն ինձ շատ է հետաքրքրում, կարող ենք մենք՝ սովորական քաղաքացիներս, հակադարձել «շան լակոտն ու լածիրակը» դու ես, երբ մեզ վիրավորում է պաշտոնատար անձը։ Բայց ամենակարևորն, իհարկե, Նարեկի առողջական վիճակն է և մի բան պատահելու դեպքում պատասխանատուն Ալեն Սիմոնյանն է։ Ոչ մի հարց լրագրողների կողմից չտրվեց։ Դուք կարող եք չկիսել նրանց հայացքներն ու խոսույթը, բայց ակնհայտ ապօրինությունների դեմ պետք է ընդվզեք, որովհետև հաջորդը կարող եք լինել դուք»։