«Եպիսկոպոսաց ժողովը Մայր Աթոռից դուրս գումարելը հանրությանը տալիս է սխալ ազդակ». Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Եպիսկոպոսաց ժողովը որոշվել է գումարել Ավստրիայի Սանկտ Փյոլթըն քաղաքում՝ փետրվարի 16-19-ին։
Սա պարզապես վայրի ընտրություն չէ։ Սա խորհրդանիշ է՝ ինչպե՞ս է Եկեղեցին տեսնում ինքն իրեն այս ծանր պահին։ Երբ ներսում կուտակվել են լրջագույն հարցեր, երբ եպիսկոպոսներ, վարդապետներ, քահանաներ ու սարկավագներ բարձրաձայնում են խորքային մտահոգություններ Մայր Աթոռի շուրջ ստեղծված վիճակի վերաբերյալ, Եպիսկոպոսաց ժողովը Մայր Աթոռից դուրս գումարելը հանրությանը տալիս է սխալ ազդակ՝ թե վստահության ճգնաժամը կարելի է հաղթահարել հեռավորությամբ, ոչ թե պատասխանատվությամբ։
Բարենորոգումը սկսվում է ոչ թե հայտարարություններից, այլ համարձակությունից։ Եկեղեցու բարենորոգման օրակարգը առաջին հերթին պատասխանատվության օրակարգ է՝ ճշմարտության առաջ կանգնելու, սխալը կոչելու իր անունով, լսելու և լսելի լինելու, և ամենակարևորը՝ նույն հարկի տակ վերականգնելու վստահությունը։ Երբ վստահությունը խախտված է, լուծումը «ավելի հեռու գնալը» չէ, այլ՝ ավելի մոտ կանգնելն ու բաց խոսելը։ Որովհետև Եկեղեցին, որքան էլ համաշխարհային է իր առաքելությամբ, իր խիղճը պահում է հենց Մայր Աթոռում՝ որպես հավատքի, ավանդության, և ժողովրդի հետ ապրած պատմության տուն։
Եթե ուզում ենք, որ Եկեղեցին նորից դառնա վստահելի հենարան, պետք է վերադառնալ հիմքին՝ պարզությանը, հաշվետվողականությանը, արդարությանը, և ներքին մաքրմանը։
Բարենորոգման ճանապարհը մեկ բան է պահանջում՝ չփախչել ծանր ճշմարտությունից, այլ ուղիղ կանգնել դրա առաջ ու հաղթահարել այն։ Եկեղեցին չի կարող բուժվել հեռավորությունից։ Եկեղեցին բուժվում է ճշմարտությունից և պատասխանատվությունից»: