«Մոտեցումը կարծես միտում ունի ստվերելու Բանակի օրը»․ ՀՅԴ

«ՀՅԴ Հայաստան»-ը ֆեյսբուքյան էջում հայտնում է․ «Որևէ հայ չի կարող դեմ լինել Հայրենիքի համար նահատակների հիշատակը հարգելու համար միասնական օր ունենալու գաղափարին։
«Հայաստան» խմբակցությունը, սակայն, համաձայն չէ մեր նահատակների հիշատակի օրը հունվարի 27-ը սահմանելու հետ՝ պարզ պատճառով։ Օրն անմիջապես նախորդում է Հայոց բանակի կազմավորման օրվան, իսկ վերջին տարիներին այդ օրը պետական միջոցառումների բացակայության պայմաններում նման մոտեցումը կարծես միտում ունի ստվերելու Բանակի օրը։
Նախագծի քննարկման արդյունքում մենք առաջարկել ենք տարբեր խորհրդանշական օրեր սահմանել մեր նահատակների հիշատակի հարգման համար, սակայն իշխանությունը, ինչպես միշտ, ականջալուր չի եղել որևէ առաջարկի և բացառապես քննարկել է հունվարի 27-ի տարբերակը, որին էլ մենք դեմ ենք արտահայտվել»։