«Նախ և առաջ Ձեզ փրկեք այդ նվաստացուցիչ հպատակությունից»․ Արթուր Սաքունց

Իրավապաշտպան Արթուր Սաքունցը ֆեյսբուքյան էջում գրել է․ «Իհարկե Արա Աբրահամյանին լուրջ չեմ ընդունում և ընդհանրապես որպես հանրային դերակատարի հավակնություն ունեցող անձ իր գործունեությունը համարում եմ պուտինյան ռեժիմի պայմաններում գլուխը պահող։
Հիմա նրա որդին որոշել է ամուսնանալ, լավ է անում, ինքն իր անձնական կյանքը, ում ինչ գործ։
Բայց երբ հանրային հատուկ ուշադրության է արժանանում այդ կնոջ դավանանքի, կրոնական համոզմունքների հարցը, սա միանշանակ չեմ ընդունում։ Կրոնական համոզմունքներն էլ է զուտ անձնական տիրույթում, և ոչ մեկի գործը չի, թե որևէ մարդ ինչ կրոնական դավանանքի է պատկանում։ Նման մերժողական կամ քննադատական մոտեցումները, թիրախավորումը ակնհայտ խտրական մոտեցման, մտածելակերպի մասին է վկայում, որն անթույլատրելի ու մերժելի է քաղաքակիրթ հասարակության տեսակետից։
Եվ անգամ նույն Արա Աբրահամյանը չպետք է և չի կարող անգամ որևէ միջամտություն ունենա իր արդեն բավական չափահաս որդու անձնական կյանքում ընտրության մեջ։
Խնդիրը սա չէ։ Այլ երբ նույն Արա Աբրահամյանը փորձում է հանդես գալ հայու գենի, հայության, Հայաստանի Հանրապետության փրկությամբ, այ նման կեղծ խոսույթները չեմ ընդունում։
Մի փրկեք, լա՞վ, մեզ, մեր փրկությունը Հայաստանի Հանրապետության որպես ինքնիշխան, ժողովրդավարական, իրավական, սոցիալական պետության լինելու մեջ է, և քաղաքակիրթ հանրության մեջ լինելու մեջ է, ոչ թե մարդկության ու քաղաքակրթության դեմ հանցագործություններ կատարող, ագրեսոր, իզգոյացված ռեժիմի մեջ, որին կապված եք ուղնուծուծով, հազար պորտալարով։
Նախ և առաջ Ձեզ փրկեք այդ նվաստացուցիչ հպատակությունից»: