«Եկեղեցիները երկու տեսակի են՝ իրական և կեղծ կամ աղանդավորական»․ Էդգար Էլբակյան

Քաղաքագետ Էդգար Էլբակյանի ֆեյսբուքյան գրառումը․ «Քրիստոնեական կոչվող եկեղեցիները, եթե պարզ խոսենք, երկու տեսակի են՝
1․ իրական, այն է՝ հիմնված Քրիստոսի իշխանությամբ և առաքյալների ձեռամբ (հմմտ․ Մտթ․ 16։18-19; 28։18-20),
2․ կեղծ կամ աղանդավորական՝ հիմնված առաքելական իշխանություն չունեցող մարդկանց կողմից։
Ըստ այսմ՝ բոլոր ծանոթ մակդիրները՝ «ուղղափառ», «կաթոլիկ»/«կաթուղիկէ», «ընդհանրական», «առաքելական», իրական քրիստոնեական եկեղեցիների անուններն են։
«Ուղղափառ» նշանակում է առաքելահաստատ ուղիղ դավանանքին հետևող, կաթոլիկ/կաթուղիկե նշանակում է տիեզերական (ընդհանրական), առաքելական՝ առաքյալ(ներ)ի կողմից հիմնված։ Պարզ ասած՝ Հայոց եկեղեցին, առաքելականից բացի, նաև ուղղափառ ու կաթոլիկ է և մաս ընդհանրական եկեղեցու, իսկ կաթոլիկ (հռոմեական) եկեղեցին, որ հիմնվել է Պետրոս առաքյալի կողմից՝ նաև առաքելական և ուղղափառ։
Հազարամյակներ շարունակ մեր պատարագում Տիրոջն աղաչել ենք «վասն ամենայն սուրբ և ՈՒՂՂԱՓԱՌ եպիսկոպոսաց», իսկ մեր հավատո հանգանակի նզովքի բաժնում էլ հիշատակվում ենք որպես «ԿԱԹՈՒՂԻԿԷ եւ ԱՌԱՔԵԼԱԿԱՆ Սուրբ Եկեղեցի»։
Այսօրինակ ազգային թեմաներով մարդկանց խաբել փորձող սատանայածինների մասին Քրիստոս Աստված ասել է․ «Դուք հոր կողմից սատանայի զավակներ եք, և ձեր հոր ցանկություններն եք ուզում կատարել, թեև նա ի սկզբանե մարդասպան էր և ճշմարտության մեջ չմնաց, որովհետև նրա մեջ ճշմարտություն չկար: Երբ որ նա սուտ խոսի, ինքն իրենից է խոսում, քանի որ նա սուտ է և ստի հայր» (Հովհ․ 8։44)»։