«Մեր խաղաղասեր հարևաններն արդեն սկսել են մտմտալ». Վարդան Բալյան

Քաղաքական վերլուծաբան Վարդան Բալյանի ֆեյսբուքյան գրառումը. «Մեր խաղաղասեր հարևաններն արդեն սկսել են մտմտալ: Ադրբեջանական սոցմեդիայում որոշակի քննարկումներ կան այն մասին, որ Թուրքիան նախապատրաստում է անհրաժեշտության պարագայում իրականացնել ռազմական օպերացիա Իրանի հետ սահմանին: Հնարավոր միգրացիոն ռիսկի կառավարման և իր տարածքում ներքին անվտանգություն ապահովելու նպատակադրումով թուրքական ղեկավարությունը, կարծես, որոշում է ընդունել ստեղծել բուֆերային գոտի: Եթե ավելի պարզ, ապա խոսքը գնում է թուրքական ռազմուժի օգտագործումով ներկայիս իրանական տարածքում, Թուրքիայի հետ սահմանակից, հիմնականում քրդաբնակ շրջաններում, այսպես կոչված անվտանգային գոտու ստեղծման մասին: Կհիշեք երևի, որ թուրքերը պարբերաբար այդպես էին վարվում նաև Սիրիայի հյուսիսային շրջաններում մինչև ի վերջո Ասադին փոխեցին...
Հատկանշական է, որ որոշակի մտահոգություններ են բարձրաձայնվում իրանական հյուսիսային շրջանների ադրբեջանական բնակչության անվտանգության հետ կապված, ըստ որում, որպես սպառնալիք նշվում են քրդերը: Պարզվում է, երբեմնի հայաբնակ Սալմաստի, Խոյի, Մակուի և Ուրմիայի շրջանների ռազմակալման սպառնալիքը քրդական ռազմական ապստամբ ուժերի կողմից գնահատվում է՝ որպես իրական սպառնալիք, ու հնչում են շատ հետաքրքիր կոչեր՝ չի կարելի թույլ տալ «երկրորդ ղարաբաղյան խնդրի» առաջացում:
Այս ամենն, իհարկե, մեզ հետ որևէ կապ չունի, մենք փակել ենք Ղարաբաղի էջը վերջնականապես, մեր խաղաղասեր հարևանների հետ կայուն խաղաղություն ենք կառուցում, ու ինչ-որ առումով գուցե շատ ավելի լավ կլինի, որ հարավում էլ Թուրքիայի ու Ադրբեջանի հետ սահման ունենանք: Չնայած, որ խորանում ենք, ամբողջ աշխարհն այսօր գլոբալացվում է, սահմանները վերացնում, ի՞նչ իմաստ ունի մի հատ էլ տանջվել՝ սահմանազատում, սահմանագծում, սահմանների պահպանություն ու պաշտպանություն...Անիմաստ ծախսեր են, կարելի է...Կարելի է, իհարկե, բայց մինչև հունիսի 7 այս մասին կլռեն դեռ»: