«Կուկուռուզ կրծելով ու պեռաշկի ուտելով ռիսկերն ինքնուրույն չեն կառավարվում». Վահագն Սարոյան

Ռազմական փորձագետ Վահագն Սարոյանը ֆեյսբուքյան էջում գրում է․ «Իրանի շուրջ զարգացող իրադարձությունները և ընդհանրապես Մերձավոր Արևելքում խորացող լարվածությունը չեն կարող շրջանցել Հայաստանը։ Հայաստանի կրավորական կամ լռակյաց դիրքորոշումը գին ունի։
Այսօր արդեն պետք է հստակ և հրապարակային գործողությունների պլան ունենան այսօրվա կառավարիչները, օրինակ՝ եթե Իրանից հնարավոր մեծածավալ ներհոսք լինի դեպի Հայաստան, եթե տարածաշրջանային բախումները հանգեցնեն տնտեսական շոկերի, եթե համատարած ճնշող գնաճ լինի, եթե առաջանան ֆինանսական, էներգետիկ կամ լոգիստիկ ռիսկեր։
Պետք է պարզ լինի՝ պետությունն ինչ մեխանիզմներով է պատրաստվում կառավարել այդ ռիսկերը, ինչպես է պաշտպանելու սոցիալական խոցելի խմբերին և ինչպես է ապահովելու տնտեսական կայունությունը։
Հայաստանը լուսնի վրա չէ։ Տարածաշրջանային ցնցումները անխուսափելիորեն ազդեցություն են ունենում նաև մեզ վրա։ «Կուկուռուզ» կրծելով ու պեռաշկի ուտելով այդ ռիսկերը ինքնուրույն չեն կառավարվում»: