«Ձեր մեջ կա՞ մեկը, որ պատրաստ է հանուն իր պետության զոհվել»․ Արեգ Սավգուլյան

Պատմաբան Արեգ Սավգուլյանի ֆեյսբուքյան գրառումը․ «Այաթոլլա Ալի Խամենեին գիտի, թե ով է իր դեմ նստածը։ Հայրենիքի բեռնաթափման և 1/3-ի զիջման, անկախության պատվիրակման, ազգային ինքնության զոհաբերման և տասնյակ հազարավոր մարդկանց ճակատագրերի խեղման և խորտակման հակահերոսը։ Տեսնես ի՞նչ էր մտածում Խամենեին, երբ լսում էր Նիկոլի փոխադարձ ջերմ հարաբերությունների հավաստիացման ծղրտոցը։ Իրանի իմաստուն առաջնորդի հայացքը խորաթափանց է և անընթեռնելի, և եթե նիկոլը փոքր-ինչ պարսկերեն իմանար կամ Գևորգ Պապոյանի մարգարեական ձիրքը, գուցե գուշակեր թե ի՞նչ են մտածում ուրիշներն իր մասի, բայց դե թքած, կարևորը ինքը ողջ ու առողջ է։
Իրանի գերագույն առաջնորդն ինձ համար հերոս չէ, թող պարսիկները գնահատեն կամ դատապարտեն նրան, իրենց ներքին գործն է, բայց նա զոհվեց իր պատկերացրած աշխարհի և իր քաղաքակրթական արժեհամակարգի, դավանանքի հետևորդը, հովիվը և զինվորը, լինելու համար։ Նա ապացուցեց, որ Հայրենիքի և իսլամական պետության համար սերը և նվիրումը ավելին է քան իր և իր ընտանիքի, մանկահասակ թոռների, և ողջ իշխանական էլիտայի ու նրանց մերձավորների կեցությունն ու ապագան։ Նա ընտրեց երկնային կյանքը և հրաժարվեց սեփական պետության մեջ պանդուխտ և օտարական, պատվազուրկ և անհայրենիք, չինքնութենացված և անդեմ լինելու ճակատագրից և կառչեց իր աներկբա հավատից, որը ցանկացած բանական մարդու մոտ պետք է նվազագույնը պատկառանքի և գնահատանքի մտորումների տեղիք տա։ Եվ իրավամբ նա կդասվի պատմության համաշխարհային դեմքերի շարքին որպես իմաստո՞ւն, թե՞ «բռնապետ-դահիճ»՝ կթելադրի նոր աշխարհակարգը։
Հ.Գ. Թավշյա որկրամոլների թեթևսոլիկ կեցվածքը և փոթորկվող համաշխարհային պատերազմում Հայաստանը խաղաղության հանգրվան մատուցելու կարճամտությունն ինձ մոտ միայն ժպիտ է առաջացնում։ Բոլորդ միասին վերցրած ընդամենը մի ավտոբուս չե՞ք, իսկ ձեր մեջ կա՞ մեկը, որ պատրաստ է հանուն իր պետության համար զոհվել»։