«Քաղաքացիների հետ շփումներից և ձեզ հետ շփումներից հետո ինձ մոտ դիսոնանս է առաջանում»․ Սրբուհի Գալյանը՝ լրագրողներին

«Ամփոփելով 2 օրվա քարոզարշավը՝ ի՞նչ տպավորություններ եք ստացել, քաղաքացիներն ինչպե՞ս են վերաբերում իշխանությանը, հաճախ են նշում ընդդիմադիրները, որ հանրային աջակցության վարկանիշի ահռելի նվազում ունեք․ դուք նման տպավորություն ստացե՞լ եք»,- այսօր ճեպազրույցի ժամանակ հարց ուղղվեց Արդարադատության նախարար Սրբուհի Գալյանին։ «Նախ ներկուսակցական քարոզարշավի մասին է խոսքը, բայց նաև դա լավ առիթ էր քաղաքացիների հետ շփվելու։ Ինձ մոտ նրանց հետ շփումներից և ձեզ հետ շփումներից դիսոնանս է առաջանում, որովհետև ձեր հարցերը լսելով՝ ես ինչ-որ ապոկալիպտիկ տրամադրություններ եմ սկսում ունենալ՝ մտածելով, որ մեզ մոտ ամեն ինչ վատ է, վատ է, վատ է․․․ Բայց ամեն ինչ վատ չէ այն դեպքում, երբ մենք շփվում ենք հասարակության, հանրության ներկայացուցիչների հետ»,- պատասխանեց նախարարը։