«Սոված թոշակառու պետք է չլինի». Նիկոլ Փաշինյան

«Աշխատանքային կենսաթոշակ ստացող մեր մոտ 600 հազար քաղաքացիների, նպաստ ստացող հաշմանդամություն ունեցող տասնյակ հազարավոր քաղաքացիների, ծերության նպաստ ստացողների թոշակը բարձրանալու է ուղիղ 10 000 դրամով: Մենք ունենք 660 հազար շահառու: Էն մյուս կտորի մեջ կան մարդիկ, որ նույնիսկ ավելին է բարձրանում, քան 10 000-ը»,- վարչապետ Նիկոլ Փաշինյանի հետ քննարկման ժամանակ ասել է Աշխատանքի և սոցիալական հարցերի նախարար Արսեն Թորոսյանը:

Նա ընդգծել է, որ կան զինվորական ծառայության կենսաթոշակառուներ, որոնց դեպքում բանաձևը մի փոքր այլ է. «Այստեղ մենք 2 ցուցանիշ ենք փոխում, որի արդյունքում ստացվում է, որ մեր շատ զինծառայողների երկարամյա ծառայության կենսաթոշակը կբարձրանա 15 000 դրամով, և շատ քիչ դեպքերում՝ 5, 6, 7 հազար դրամով»,- նշել է Թորոսյանը:

Նիկոլ Փաշինյանը, արձագանքելով այս թվերին, ասել է. «Հազար ներողություն էս կոպիտ ձևակերպման համար, շատ կոպիտ որ ձևակերպենք, մենք ասում ենք՝ սոված թոշակառու պետք է չլինի»: