«Ադանա քեբաբ ուտողները թքած ունեն, թե 1909-ին Ադանայում քեբաբի մեջ ինչքա՜ն արյուն կար հայի»․ Արա Պողոսյան

Քաղաքագետ Արա Պողոսյանի ֆեյսբուքյան գրառումը․ «Ադրբեջանն այս ընթացքում անում է երկու բան՝ բանակի զինում և արդիականացում մի կողմից, իսկ մյուս կողմից՝ դիվանագիտական անդադար ճնշում Հայաստանի նկատմամբ։ Դրանցից զատ, մյուսը, որը ունի ավելի երկարաժամկետ նպատակ՝ փոխկապակցվածության ստեղծում Հայաստանի հետ, որով Հայաստանը լոգիստիկ առումով, տնտեսապես, էներգետիկ առումով էական կախվածություն կունենա Ադրբեջանից և Թուրքիայից...
Սրանց ռազմավարական նպատակը՝ միջնաժամկետ հեռանկարում անշրջելիորեն Հայաստանին զրկել ռազմա-քաղաքական բալանս հաստատելու հնարավորությունից, իսկ երկարաժամկետ հեռանկարում՝ Հայաստանին զրկել ինքնիշխան, սեփական շահերից ելնելով, սեփական ցանկությամբ տարածաշրջանային և գլոբալ որոշումներ կայացնելու հնարավորությունից։
Սա‘ է այսօր դրված սեղանին...
Հ.Գ. Իհարկե, Ադանա քեբաբ ուտողները խորապես թքած ունեն, թե 1909-ին Ադանայում Ադանա քեբաբի մեջ ինչքա՜ն արյուն կար՝ հայի»: