«Անհրաժեշտություն է իրականություն դարձնել Սադարակի միջանցքի նախագիծը»․ Նաիրի Հոխիկյան

Լրագրող, հանրային գործիչ Նաիրի Հոխիկյանը գրում է․ «Տարածաշրջանային փխրուն խաղաղությունը կայուն վստահության վերածելու համար անհրաժեշտություն է իրականություն դարձնել ՍԱԴԱՐԱԿԻ ՄԻՋԱՆՑՔԻ նախագիծը, որը ցամաքային ճանապարհով կմիացնի Հայաստանն ու Իրանը։
Նախիջևանի տարածքում 15-20կմ ճանապարհով անցնող այդ երթուղին սկսվելու է Հայաստանի Երասխ գյուղից և ավարտվելու է Իրանի Քարաքոյվուն, ապա Փոլդաշտ բնակավայրերի մոտ՝ միանալով Ջոլֆայի միջազգային մայրուղուն։ Այն տնտեսական մեծ օգուտներ է բերելու ինչպես Հայաստանին, այնպես էլ Իրանին, Վրաստանին, Ռուսաստանին, Չինաստանին և ՀՅՈՒՍԻՍ-ՀԱՐԱՎ միջազգային նախագծի մյուս շահագրգիռ կողմերին։ Ադրբեջանն էլ կարող է ստանալ միջանցքի իր շահաբաժինը։
Սադարակի միջանցքի գաղափարը թեպետ նոր չէ, բայց նորացված տարբերակն առաջ է քաշել Հայաստանի դիվանագիտական հիմնադրամը, և այս մասին մենք արդեն հանդիպումներ ունեցել ենք Իրանի, ՌԴ պաշտոնական ներկայացուցիչների հետ, եղել են կառուցողական պայմանավորվածություններ։ Հանդիպման առաջարկ ուղարկել ենք ՀՀ ԱԺ «Հայաստան» և «Ուժեղ Հայաստան» խմբակցություններին՝ քննարկելու նախագծի մանրամասները և Հայաստանի համար շահավետ ուղիները։ Սպասում ենք արձագանքների։
Կարևոր է գիտակցել, որ եթե TRIPP նախագծով շեշտվում է խաղաղությունը, ապա Սադարակի միջանցքի նախագիծը վստահություն է, որի շնորհիվ Հայաստանը և Ադրբեջանը դառնում են հավասարազոր հնարավորությունների ու միաժամանակ պարտավորությունների երկրներ»։