«Ադրբեջանն ընդլայնում ու ամրապնդում է դիրքերը Ջերմուկի հատվածում». Դավիթ Գալստյան

Լրագրող Դավիթ Գալստյանը ֆեյսբուքյան իր էջում գրել է. «Ադրբեջանն ընդլայնում ու ամրապնդում է դիրքերը Ջերմուկի հատվածում:
Ադրբեջանը էս հատվածում ՀՀ տարածք ներխուժել ա 2022 թ. սեպտեմբերին ու, իմ հաշվարկներով, գրավել ա ավելի քան 70 քառ. կմ:
Բաքուն էս տարածքում նշանակալի ինժեներական աշխատանքներ ա իրականացրել առնվազն 2022-2023 թթ.:
Իմ ուսումնասիրած արբանյակային նոր լուսանկարները (2026 թ. հուլիս-սեպտեմբեր) ցույց են տալիս նոր և ընդլայնված ադրբեջանական ենթակառուցվածքներ:
Աշխատանքների ծավալը (ճանապարհների ընդլայնում, դիրքերի կահավորում և ամրապնդում) վկայում ա ոչ թե առանձին գործողությունների, այլ դիրքային ենթակառուցվածքի համալիր զարգացման մասին:
Աշխատանքներն իրականացվել են նախկին խորհրդային սահմանից մոտ 1,2 կմ - 6 կմ հեռավորության վրա (համաձայն ԽՍՀՄ ԶՈՒ ԳՇ 1974 թ. տոպոգրաֆիկ քարտեզի՝ սա բացահայտ Հայաստանի տարածք ա):

Դիրքերը տեղակայված են Արփա ու Որոտան գետերի կիրճերի արանքում՝ մոտ 10 կմ երկայնքով:
N.B Էս ամենը՝ ԽՍՀՄ ԶՈՒ ԳՇ քարտեզներով սահմանազատում իրականացնելու պայմանավորվածություններից, ինչպես նաև խաղաղության պայմանագրի նախաստորագրումից հետո:
Նշեմ, որ նմանատիպ փոփոխությունները վերաբերում են ոչ միայն Ջերմուկի հատվածին։ Ավելի վաղ գրել էի Սյունիքում ու Տավուշում դիրքերի ամրապնդման մասին»: