«Իրանը պետք է կրճատի ուրանի հարստացման հզորությունները՝ հակամարտությանը վերջ դնելու համար»․ Վենս

ԱՄՆ փոխնախագահ Ջեյ Դի Վենսը հայտարարել է, որ Իրանը պետք է կրճատի ուրանի հարստացման հզորությունները, որպեսզի Միացյալ Նահանգների պահանջները կատարվեն և Մերձավոր Արևելքում հակամարտությունն ավարտվի։

Reuters-ին տված հարցազրույցում Վենսը նշել է, որ Իրանի և ԱՄՆ-ի միջև ցանկացած համաձայնություն ենթադրում է Թեհրանի կողմից ուրանի հարստացման հզորությունների կրճատում։

«Կարծում եմ՝ եթե նրանք (Իրանի իշխանությունները-խմբ.) ցանկանում են ցույց տալ, որ պատրաստ են հրաժարվել միջուկային զենք ստեղծելուց, ապա պետք է իրական քայլեր ձեռնարկեն ուրանի հարստացման իրենց կարողությունների առնչությամբ»,- ասել է Վենսը։

Նա նշել է, որ Վաշինգթոնը պատրաստ է Թեհրանի հետ համաձայնագիր կնքել, սակայն միջուկային հարցի շուրջ պահանջում է կոնկրետ զիջումներ։ Նրա խոսքով՝ իրավիճակը բարդացնում է այն հանգամանքը, որ Վաշինգթոնը վստահ չէ, թե ով է որոշումներ կայացնում Թեհրանում։ Նա նշել է, որ ԱՄՆ-ն բանակցություններ է վարում Իրանի նախագահ Մասուդ Փեզեշքիանի և ԱԳ նախարար Աբբաս Արաղչիի հետ։ Սակայն, նրա պնդմամբ, պարզ չէ, թե որքան մեծ է նրանց ազդեցությունն իշխանության կառուցվածքում։