«Հայաստանում հեղափոխություն եղել է ոչ թե 2018-ին, այլ 2026-ին»․ Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը․ «Պատահական չէ, որ Նիկոլ Փաշինյանն ընդդիմությանը կոչ է անում հեղափոխություն անել, որովհետև Հայաստանում հեղափոխություն եղել է ոչ թե 2018-ին, այլ 2026-ին։
Հեղափոխությունները դասական առումով լինում են ոչ թե իշխանությունը մեկից մյուսին անցնելու ձևով, այլ արժեքների, գաղափարների ու բարոյականության արմատական փոփոխություններով։
2018-ին Սերժ Սարգսյանի փոխարեն իշխանության ղեկին նստեց Նիկոլ Փաշինյանը։ Դա հեղափոխություն չէր, այլ անունների փոփոխություն։ Իսկ իրականում երկրում չփոխվեց ուրիշ ոչինչ։
2020-ի պայմանավորված պատերազմից ու Արցախի վաճառքից հետո սկիզբ դրվեց իրական հեղափոխական գործընթացների, որոնք հաջող ավարտին հասցվեցին 2026-ի հունիսին։
Հեղափոխությունը այն է, երբ ժողովրդի գլխում տեղի է ունենում փոփոխություն։ Երբ ժողովուրդը կողմ կամ դեմ է լինում որևէ խորը փոփոխության, փոխում է ազգային, բարոյական արժեքները։
Նիկոլ Փաշինյանի հաջողած հեղափոխությունը այն էր, որ 2026-ի ընտրությունների ժամանակ Հայաստանի բնակչության մի մեծ մաս համաձայնեց Արցախի վաճառքի, Արարատի ուրացման, հայրենիքից հրաժարվելու, այլասերման, բարոյական անկման, թուրքասիրության հետ։ Դա հեղափոխություն էր, և դա է մեր ազգի ու պետականության մեծագույն ողբերգությունը։ Երբ ժողովրդի գլխում է տեղի ունենում փոփոխությունը դեպի ազգային ինքնության ոչնչացում։
Այստեղ մեծ անելիք ունեն ընդդիմադիր հիմնական ուժերը, որոնք, սակայն, զբաղված են ԱԺ-ի քաղաքական շոուներով»։