«Եթե խաղաղության ծիրը կա՝ ինչո՞ւ չենք կարող մեր հարազատների աճյունները բերել այստեղ»․ Ռուզաննա Ստեփանյան

«Անհայտ կորածների, արտաշիրիմում պահանջող և պայթյունից անհետ կորածների ծնողների հետ մոտ 60 նամակ ենք գրել միջազգային կառույցներին, ինչպես նաև Հայաստանի համապատասխան կառույցներին՝ ԱԱԾ-ին, Նիկոլ Փաշինյանին, ԱԳՆ, Հայաստանում գործող բոլոր դեսպանատներին, հատուկ դիմել ենք Մակրոնին։ Որևէ պատասխան չի ստացվել որևէ մեկից»,- ԱԺ-ում «Ուժեղ Հայաստան» խմբակցության անդամների հետ հանդիպման ժամանակ ասաց «Համահայկական ճակատ» շարժման անդամ Ռուզաննա Ստեփանյանը։
«Նրանք այն ծնողներն են, որոնք Արցախում ցեղասպանվելուց ժամեր առաջ չեն կարողացել քրիստոնեավայել հուղարկավորել իրենց երեխաներին, ամուսիններին, նույնիսկ առանց շիրմաքարի, առանց դագաղի, ադյալներով հողն են դրել, եկել այստեղ՝ մտածելով, որ շիրիմները կբերվի այստեղ։ Եթե հիմա այդ խաղաղության ծիրը կա, եթե մենք ահաբեկիչ ենք հետ վերադարձնում, ապա ինչո՞ւ չենք կարող իրենց հարազատների աճյունները բերել այստեղ։ Դա էլ է արժանապատվության խնդիր»,- նշեց Ստեփանյանը։