Ուկրաինան հարվածել է Ռյազանի մարզում գտնվող «Յանդեքս»-ի տվյալների կենտրոնին

Ռյազանի մարզում գտնվող «Յանդեքս»-ի տվյալների կենտրոնում անօդաչու թռչող սարքի հարձակման հետևանքով հրդեհ է բռնկվել, հայտնել է ռուսական ընկերությունը։ «Յանդեքս»-ը նախազգուշացրել է, որ իր ծառայությունների մի մասը կարող է անհասանելի լինել օգտատերերի համար։

«Տուժածներ չկան, համապատասխան ծառայություններն աշխատում են տեղում՝ հետևանքները վերացնելու ուղղությամբ։ Տվյալների կենտրոնի աշխատանքն ամբողջությամբ դադարեցվել է», — BBC-ի ռուսական ծառայությանը հայտնել են «Յանդեքս»-ի մամուլի ծառայությունից։

Astra-ն առավոտյան հայտնել է, որ Ռյազանի մարզի Սասովո շրջանում հրդեհ է բռնկվել «Սաստա» հաստոցաշինական գործարանի տարածքում։ Այդ ձեռնարկության տարածքում է գտնվում «Յանդեքս»-ի տվյալների կենտրոններից մեկը, որը այնտեղ բացվել է 2014 թվականին։ Ուկրաինական Exilenova+ մոնիթորինգային ալիքը պնդում է, որ ձեռնարկության տարածքին հարված է հասցվել, ինչից հետո լայնածավալ հրդեհ է բռնկվել։

Հաստոցաշինական «Սաստա» գործարանը արտադրում է նաև պաշտպանական արդյունաբերության կարիքների համար նախատեսված սարքավորումներ և 2022 թվականից գտնվում է միջազգային պատժամիջոցների տակ։