«Տպավորություն է, որ դուք կրկին ապրում եք Հ1-յան Հայաստանում». Գևորգ Գորգիսյան

820

Ուրբաթ, 06 մարտի, 2020 թ., 10:40

ԱԺ-ում բուռն քննարկումներ ծավալվեցին «Լուսավոր Հայաստան»-ի ներկայացրած «Ձերբակալված ու կալանավորված անձանց պահելու մասին» նախագծի՝ առաջին ընթերցմամբ քվեարկությունից առաջ: «Իմ քայլից» Նիկոլայ Բաղդասարյանը հայտարարեց. «Նախագծով առաջարկվում է հնարավորություն ընձեռել պատգամավորին, առանց խոչընդոտի, տեսակցել ձերբակալված ու կալանավորված անձանց: Առաջարկում ենք մերժել, քանի որ գործող օրենսդրությամբ որևէ արգելք չկա դրանում: Խնդիրն առաջանում է այն դեպքում, երբ քննիչի որոշմամբ սահմանափակում է դրված լինում տեսակցելու վրա: Կոչ եմ անում դեմ քվեարկել»:

«Լուսավոր Հայաստան» խմբակցության ղեկավար Էդմոն Մարուքյանն արձագանքեց. «Այո՛, պատգամավորներն ունեն անարգել մուտքի իրավունք, սակայն օրենքը մեկնաբանվում է Արդարադատության նախարարության կողմից, որ քննիչի արգելքի դեպքում չեն կարող, բայց արգելքը վերաբերում է նրանց, ովքեր կարող են ինֆորմացիա փոխանակել, կամ դուրս հանել, իսկ ովքեր կասկածում են պատգամավորներին, հանցագործության կանխավարկածով են առաջանորդում: Եթե այս նախագիծը չընդունվի, նշանակում է բան չի փոխվել երկում»:

Թեման շարունակեց նույն խմբակցության պատգամավոր Գևորգ Գորգիսյանը՝ դիմելով իշխող մեծամասնությանը. «Նոր իշխանության օրոք փորձեցինք այցելել Արսեն Բաբայանին, ում գործով տարաբնույթ մեկնաբանություններ կային: Փորձեցինք իրենից պարզել իրավիճակը, ինչը մեզ արգելվեց: Մուտք գործեցինք ներս, հրավիրեցին, սուրճ հյուրասիրեցին, բայց դրա համար չէինք այդտեղ: Հարգելինե՛րս, տպավորություն է, որ դուք կրկին ապրում եք Հ1-յան Հայաստանում»:

Ձայների 70 կողմ, 21 դեմ հարաբերակցությամբ՝ նախագիծն ընդունվեց: