«Այս իշխանությունն իր ձեռքերն է տաքացնում Երևանում կատարված և կատարվող շինարարությունների վրա»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Երևանն անկանոն կերպով կառուցապատվում է, այդ շինարարությունները ծանրաբեռնում են առանց այդ էլ գերծանրաբեռնված մայրաքաղաքը։ Շարունակ փչում, ռւռճացնում են մայրաքաղաքի բնակարանաշինության փուչիկը,որն առաջիկայում պայթելու է։ Սակայն այլ հարցի եմ ուզում անդրադառնալ։ Երևանի բազմահարկերի մեծ մասը կառուցված են 1970-80-ական թվականերին, 50 տարի պիտանելիության ժամկետով։ ԽՍՀՄ ժամանակ գոյություն ուներ աշխղեկների կողմից շենքերի շինհրապարակների ցեմենտի վաճառք, գողություն, ուստի այդ շենքերը ամուր չեն կառուցվել։ Այն ժամանակ Երևանում սեյսմիկ վտանգը քիչ են գնահատել, շենքերը ոչ սեյսմակայուն են կառուցել։ Հայաստանի անկախանալուց հետո բազմահարկ շատ շենքերի հիմքերը փորել, նկուղներում օֆիսներ են բացել; Շենքի հիմքերում, տարբեր հարկերում ինքնակամ շինարարությունների, պատերի ձևափոխումների հետևանքով շատ շենքերի սեսյմակայությունն ավելի է նվազել։ Մնում է աղոթել, որ Երևանում երկրաշարժ չլինի։ Այս իշխանությունը իր ձեռքերն է տաքացնում Երևանում կատարված և կատարվող շինարարությունների վրա, անցած ավելի քան 8 տարում չի հոգացել անգամ Երևանի վթարային շենքերի բնակիչներին տեղափոխելու, նրանց կացարանով ապահովելու խնդիրը։ Էլ ո՞ւր մնաց հին, պիտանելիության ժամկետն անցած բազմահարկերի ու դրանց բնակիչների խնդիրը լուծեն»։